Serbııa prezıdenti Aleksandr Výchıch qyzmetinen ketti
ASTANA. KAZINFORM — Serbııa prezıdenti Aleksandr Výchıch 27 qyrkúıekte kezekten tys parlament saılaýyna qatysyp, premer-mınıstr qyzmetine úmitker bolý úshin otstavkaǵa ketkenin málimdedi, dep habarlaıdy DW.
Výchıch 2017 jylǵy 31 mamyrdan beri Serbııa prezıdenti qyzmetin atqaryp keledi. Ol 2022 jylǵy sáýirde qaıta saılandy. Onyń prezıdent retindegi ekinshi merzimi 2027 jyldyń ortasynda aıaqtalýy tıis edi.
Serbııa Konstıtýtsııasyna sáıkes, bir adam memleket basshysy qyzmetin eki merzimnen artyq atqara almaıdy.
Qyrkúıek aıynyń basynda Výchıch eldiń bir palataly parlamenti — Halyqtyq skýpşınany taratyp, kezekten tys saılaýdy 25 qazanǵa belgiledi.
Bıliktegi Serbııanyń progressıvti partııasy Výchıchtiń «Birtutas Serbııa» tizimin basqaratynyn jáne saılaýda jeńiske jetken jaǵdaıda premer-mınıstr qyzmetine kandıdat bolatynyn rastady.
Serbııa prezıdentiniń mindetin Halyqtyq skýpşına tóraǵasy Ana Brnabıch atqarady.
Buǵan deıin Výchıch qyrkúıek aıynyń sońynda otstavkaǵa ketip, parlament saılaýyna qatardaǵy azamat mártebesinde daıyndalýǵa nıetti ekenin málimdegen bolatyn.
