Serbııa men Reseı ártisteri jańa qazaqstandyq fılmge túsedi
ASTANA. QazAqparat - Qazaqfılm «Jaǵalaý» atty jańa kórkem fılmdi túsirý jumystaryn bastady, dep habarlaıdy QazAqparat kınostýdııanyń baspasóz qyzmetine silteme jasap.
Kınostýdııa «Stalker Sınema» JShS birlese otyryp jumys ataýy «Jaǵalaý» («Kúnbaǵys») atty jańa tolyqmetrajdy kórkem fılmdi túsirýdi qolǵa aldy. Rejısseri - Elıa Gılman.
Rasýl Shybyntaıdyń stsenarıi boıynsha túsiriletin bul fılm qarapaıym otbasy týraly, sonymen qatar úlkenderdiń isine aralasyp, olardyń problemalaryn sheshpek bolǵan 13 jastaǵy jasóspirimniń ómirin baıandaıdy. 
«Bul kúnde barlyǵymyz jumys istep, aqsha tabýdan qolymyz bosamaıdy. Qolymyzdan kelgenshe óz balalarymyzǵa eń jaqsyny alyp berýge tyrysamyz, mysaly eń jaqsy telefon, ádemi kıim, tipti jaqsy mektepke ornalastyrýǵa bar kúshimizdi salamyz. Alaıda,biz balalarymyzǵa ata-analyq mahabbatymyzdy qanshalyqty berip jatyrmyz? Fılmde osy másele talqylanady. Bul týyndy eresekterge arnalady», - dedi fılmniń rejısseri Elıa Gılman.
Rejısseriniń aıtýyna qaraǵanda fılmniń jeltoqsan aıyna deıin daıyndyq kezeńinde túsirý toby jasóspirimder arasynda kastıng ótkizip, ıntererlik jáne ekstererlik lokatsııalardy tańdap, ótpeli kezeń kórinisterin túsirip úlgergen.
«Fılmniń basty keıipkeri - 13-jasar ul balany uzaq izdedik. Bul rólge keıipkerdi úsh aı boıy iriktedik. Ótpeli kezeńniń kórinisterin túsirýge bir apta qalǵanda, Rashıd Mýsın esimdi balany taýyp, birden osy rólge bekittik», - dedi rejısser.
Elıa Gılmannyń aıtýyna qaraǵanda, fılmde ákeniń rólin somdaýǵa qazaqstandyq tanymal akter Erkebulan Daıyrov bekitilgen. Al onyń dosyn talantty akter Jandos Aıbasov oınaıdy. Ana róline serbııalyq aktrısa Sloboda Mıchalovıch jáne ustazdyń róline reseılik akter Kırıll Kıaro shaqyrylǵan.
2018 jyldyń qańtar aıynda «Jaǵalaý» fılminiń túsirý jumystary jalǵasady. Barlyq túsirilimder Almaty qalasynda ótedi. 
