Serbııa men Horvatııada aptap ystyqtyń jańa tolqyny bastaldy
ASTANA. KAZINFORM — Serbııa men Horvatııa aýmaǵynda aýa temperatýrasy 40 gradýsqa deıin kóterilgen kezekti qatty ystyq tolqyny tirkeldi. Mamandar orman órtteriniń shyǵý qaýpi joǵary ekenin eskertip, turǵyndardy saqtyq sharalaryn saqtaýǵa shaqyrdy. Bul týraly Anadoly jazdy.
Serbııada aýa temperatýrasy 40 gradýsqa jetti
Serbııada termometr baǵanasy 40 gradýsqa deıin kóterildi. El premer-mınıstri Djýro Machýt aýa raıynyń kúrt ysyýy men ózenderdegi sý deńgeıiniń tómendeýine baılanysty shuǵyl keńes ótkizdi.
Kezdesý qorytyndysy boıynsha Machýt BAQ ókilderine qurǵaqshylyq saldarynan Dýnaı ózenindegi sý deńgeıiniń rekordtyq tómendeýin bılik jiti baqylap otyrǵanyn aıtty. Sondaı-aq ol azamattardy elektr energııasyn únemdi paıdalanýǵa shaqyrdy.
Serbııanyń meteorologııalyq qyzmeti qazirgi ystyq tolqyny orman órtteriniń paıda bolý qaýpin arttyratynyn eskertip, turǵyndarǵa asa saq bolýǵa keńes berdi.
Sınoptıkterdiń málimetinshe, Serbııada joǵary temperatýra apta boıy saqtalady. Keı óńirlerde aýa temperatýrasy 40 gradýsqa deıin kóterilýi múmkin.
Horvatııada «qyzyl deńgeıdegi» qaýip jarııalandy
Horvatııanyń meteorologııalyq qyzmeti osy aptada el aýmaǵyna jańa aptap ystyq tolqyny áser etip jatqanyn habarlady. Osyǵan baılanysty búkil memleket aýmaǵynda «qyzyl deńgeıdegi qaýip» jarııalandy.
Qatty ystyq saldarynan deneniń shamadan tys qyzý qaýpi artyp otyrǵandyqtan, balalar men egde jastaǵy adamdardyń jaǵdaıyna erekshe nazar aýdarý, múmkindik bolsa kúnniń eń ystyq ýaqytynda syrtqa shyqpaý jáne suıyqtyqty kóbirek ishý usynyldy.
Aıta keteıik, Horvatııanyń Pýla qalasynda tańerteń aýa temperatýrasy 40,4 gradýsqa jetse, Rıeka qalasynda 40 gradýs tirkeldi.
Eske sala keteıik, buǵan deıin Ońtústik Koreıada temperatýralyq rekord ornatyldy.
