Serbııa men Eýropanyń birqatar elinde orman órtteri órship tur
ASTANA. KAZINFORM – Serbııanyń birneshe óńirin sharpyǵan orman órtterin sóndirý jumystary jalǵasyp jatyr. Tilsiz jaýdyń taralýyna aptap ystyq pen qurǵaqshylyq áser etýde, dep habarlaıdy Euronews.
Serbııanyń soltústik-shyǵysyndaǵy «Delıblat qumdary» tabıǵı qoryǵynda iri órtti sóndirýge jerústi bólimsheleri men tikushaqtar jumyldyryldy. Jergilikti bıliktiń málimetinshe, órt keminde 700 gektar aýmaqty sharpyǵan. Qoryq Belgradtan shyǵysqa qaraı shamamen 50 shaqyrym jerde ornalasqan.
Eldiń ońtústigindegi Kralevo qalasynyń mańynda da orman órtenip jatyr. Birneshe aýyldyń turǵyndary evakýatsııalandy. Jergilikti turǵyndardyń aıtýynsha, nebári birneshe kúnniń ishinde 60 gektardan astam qaraǵaıly orman janyp ketken.
– Shyǵyn orasan. Bul jas qaraǵaıly orman edi. Qaraǵaılar 1980 jyldary otyrǵyzylǵan, – dedi jergilikti turǵyndardyń biri Associated Press agenttigine.
Serbııanyń ortalyq bóligindegi Ibar ózeniniń ańǵarynda taǵy bir iri órt shyqty. Órt sóndirýshiler ushaq-amfıbııalardyń kómegimen jetýi qıyn aýmaqtarda jumys istep, jaqyn mańdaǵy aýyldardy órtten qorǵaýǵa kúsh salýda.
Ótken aptada Serbııa gıdroelektr stantsııalaryndaǵy elektr energııasyn óndirý kólemin qysqartýǵa májbúr boldy. Eldegi eń iri eki gıdroelektr stantsııasynyń qýaty jobalyq kórsetkishtiń tıisinshe 20 jáne 30 paıyzyna deıin tómendetildi.
Ońtústik-Shyǵys Eýropada da aptap ystyq saqtalyp tur. Italııanyń soltústigindegi Emılııa-Romanıa aımaǵynyń jetýi qıyn Vedrıano aýdanynda orman órti shyqty. Ony sóndirý jumystary beısenbi kúnniń ekinshi jartysynan beri jalǵasyp jatyr.
Italııanyń barlyq iri qalasynda aptap ystyqqa baılanysty eń joǵary deńgeıdegi eskertý jarııalandy.
Kórshiles Frantsııanyń ońtústigindegi Var departamentinde bolǵan iri orman órti qazirgi ýaqytta taralmaı tur. Alaıda jańa órt oshaqtarynyń paıda bolý qaýpine baılanysty aımaqta órt sóndirýshilerdiń edáýir kúshi saqtalǵan.
– Bul óte uzaqqa sozylýy múmkin órt. Mysaly, tańerteń biz negizinen daıyndyq jumystarymen aınalysamyz, óıtkeni jel men aýa temperatýrasynyń kóterilýine baılanysty qaýip kúnniń ekinshi jartysynda kúsheıedi, – dedi Marsel teńiz órt sóndirýshiler batalonynyń aǵa serjanty Entonı.
20 shildede bastalǵan órt 60 sharshy shaqyrymnan astam aýmaqty sharpydy. Bul – keıingi ondaǵan jyldaǵy óńirde bolǵan eń iri orman órti.
«Eýropadaǵy klımattyń jaı-kúıi – 2025» baıandamasyna sáıkes, Eýropa álemdegi eń jyldam jylyp jatqan qurlyq bolyp otyr. Mundaǵy temperatýra dúnıejúzilik ortasha kórsetkishpen salystyrǵanda shamamen eki ese jyldam kóterilýde. Mamandar klımattyń jylynýyna baılanysty aptap ystyq kezeńderi jıilep, kúsheıe túsetinin eskertedi.
Aıta keteıik, Túrkııada 44 orman órtine qatysty tergeý júrgizilip, kúdiktiler qamaýǵa alyndy.
