Serbııa Qazaqstanǵa balalar taǵamyn shyǵarý jobasyn usyndy
ASTANA. KAZINFORM — Serbııa Qazaqstanmen birge balalar taǵamy men jemis botqasyn shyǵaratyn óndiris ashýdy josparlap otyr. Bul týraly Astanadaǵy alǵashqy Qazaqstan–Serbııa Іskerlik keńesi barysynda Grotska mýnıtsıpalıtetiniń jobalyq koordınatory Rade Ivetıch habarlady.
Grotska — jemis-jıdek óndirisimen tanymal Serbııa qalasy. Munda birneshe jeke óndirýshiniń kooperatıvteri bar, al jalpy 24 gektar jemis baǵy balalar taǵamy men botqasyn óndirýge tolyq jetedi.
— Qazaqstandyq ınvestorlarmen birge óndiristi keńeıtip, ónimdi Qazaqstan naryǵyna jetkizýdi josparlap otyrmyz. Sonymen qatar, organıkalyq ónimge basymdyq berilip, jemis aǵashtaryn qorǵaýǵa arnalǵan quraldarǵa qyzyǵýshylyq bar, — dedi Ivetıch.
Grotska mýnıtsıpalıtetiniń jobalyq koordınatory Rade Ivetıch Іskerlik keńes eki el úshin de tıimdi bolatynyn alǵa tartty.
— 2022 jyldan beri Qazaqstannyń ekonomıkalyq ókilderi Serbııadaǵy jobalardy zerttep, yntymaqtastyq múmkindikterin baǵalap keledi. Qazirgi ýaqytta kelissózder jalǵasýda, naqty ınvestıtsııalyq usynystar áli túspegen. Degenmen, bul Іskerlik keńes eki el úshin de tıimdi yntymaqtastyqty kórsetýge múmkindik berdi, — dedi ol.
Joba jemis-jıdek óndirisin damytýǵa, organıkalyq ónim kólemin ulǵaıtýǵa jáne eksportty keńeıtýge jol ashady.
Aıta keteıik, buǵan deıin serb ınvestorlaryna Qazaqstandaǵy basym salalar usynylǵanyn jazǵanbyz.
