Serbııa Qazaqstan úshin Eýropadaǵy mańyzdy strategııalyq seriktes — Toqaev
ASTANA. KAZINFORM — Serbııa Qazaqstan úshin Eýropadaǵy mańyzdy strategııalyq seriktes. Bul týraly Aqordada elimizge resmı saparmen kelgen Serbııa Prezıdenti Aleksandr Výchıchpen keńeıtilgen quramdaǵy kelissózder barysynda Memleket basshysy Qasym-Jomart Toqaev aıtty.
— Dıplomatııalyq qarym-qatynastarymyzdyń ornaǵanyna 30 jyl tolýy qarsańynda, aıryqsha sımvoldyq kezeńde kelip otyrsyz. Bul shynynda da óte mańyzdy ári shynaıy dostyǵymyz ben ózara qurmetimizdi aıǵaqtaıtyn beles sanalady. Serbııa biz úshin Eýropadaǵy mańyzdy strategııalyq seriktes. Qarym-qatynastarymyzdy odan ary tereńdetýge, yntymaqtastyǵymyzdy ártúril baǵyttarda damytýǵa ázirmiz, — dedi Prezıdent.
Memleket basshysynyń atap ótýinshe, eki eldiń parlamentaralyq qarym-qatynasy da óte belsendi. Saýda-sattyq da artyp kele jatyr.
— 60-qa jýyq serb kompanııasy elimizde tabysty jumys istep tur. Keshe ǵana Qazaqstan-Serbııa iskerlik keńesiniń otyrysy ótti. Otyrys nátıjesine oń baǵa beremin. Ol eki eldiń saýda-ekonomıkalyq ári ınvestıtsııalyq baılanystaryn jandandyrýǵa yqpal etetindigine senemin. Mádenı-gýmanıtarlyq yntymaqtastyq da kún tártibinde mańyzdy oryn alady. Halyqaralyq uıymdar aıasynda da ózara is-qımyldy jalǵastyryp kelemiz. Osy rette Serbııanyń halyqaralyq bastamalarymyzdy qoldaǵany úshin shynaıy rızashylyǵymyzdy bildiremiz, — dedi Qasym-Jomart Toqaev.
Buǵan deıin Qasym-Jomart Toqaev Serbııa Prezıdenti Aleksandr Výchıchti Aqordada qarsy alǵan edi.
