Serbııa kásipkerlerine qolaıly jaǵdaı jasaýǵa daıynbyz — Prezıdent
ASTANA. KAZINFORM — Qazaqstan Serbııa kásipkerlerine qolaıly jaǵdaı jasaýǵa daıyn. Bul týraly Aqordada Serbııa Prezıdenti Aleksandr Výchıchpen kelissózderden keıingi BAQ ókilderine arnalǵan birlesken málimdeme barysynda Memlket basshysy Qasym-Jomart Toqaev aıtty.
— Prezıdent Aleksandr Výchıch ekeýimiz keńeıtilgen quramda mazmundy kelissóz júrgizdik. Saýda, kólik-logıstıka, energetıka, ónerkásip, aýyl sharýashylyǵy, aqparattyq tehnologııalar, jasandy ıntellekt jáne mádenı-gýmanıtarlyq salalardaǵy yqpaldastyq máselelerin jan-jaqty talqyladyq. Naqty ýaǵdalastyqtarǵa qol jetkizdik. Saýda-ekonomıka jáne ınvestıttsııa salasyndaǵy baılanysty damytý qajettigine basa nazar aýdardyq, — dedi Qasym-Jomart Toqaev.
Memleket basshysynyń aıtýynsha, qazir eki eldiń arasynda alys-beris kóbeıip keledi. Elimizde 60-qa jýyq serb kompanııasy tabysty jumys istep jatyr. Degemen, eki elidń ekonomıkalyq áleýeti budan álde qaıda joǵary.
— Sondyqtan saýda-sattyq kólemin ulǵaıtýǵa kelistik. Memleketterimizdiń múddesine saı keletin jańa ınvestıtsııalyq jobalardy pysyqtaýǵa ýaǵdalastyq. Ekonomıkalyq yntymaqtastyq jónindegi úkimetaralyq komıssııa bul jumysqa basa mán berýi qajet. Elimizge Prezıdent Výchıchpen birge Serbııanyń iri kásipkerleri keldi. Sapar qarsańynda Qazaqstan-Serbııa iskerlik keńesiniń otyrysy ótti. Prezıdent Výchıch ekeýimiz onyń nátıjesin joǵary baǵaladyq. Bıznes ókilderi arasyndaǵy baılanysty kúsheıtý qajet ekenin atap óttik. Jalpy, biz Serbııa kásipkerlerine qolaıly jaǵdaı jasaýǵa daıynbyz, — dedi Memleket basshysy.
Buǵan deıin Serbııa Prezıdenti Aleksandr Výchıch Qazaqstannyń eń joǵary nagradasy «Altyn qyran» ordenimen marapattalǵanyn jazǵan edik.
