Serbııa basshysy Qazaqstan Prezıdentinen Belgradta Elshilik ashýdy ótindi

ASTANA. QazAqparat -  Serbııa Prezıdenti Aleksandr Výchıch Belgradta jaqyn arada Qazaqstan Elshiligi ashylatyndyǵyna úmit bildirdi. Ol bul týraly búgin Aqordada Elbasy Nursultan Nazarbaevpen kelissózderden keıingi birlesken málimdeme barysynda aıtty, dep habarlaıdy QazAqparat tilshisi.

«Saıası yntymaqtastyǵymyzdyń joǵary deńgeıde bolýy qýantady. Buǵan qosa, biz halyqaralyq arenada da yntymaqtastyqty jolǵa qoıǵanbyz. Qurmetti Prezıdent myrza, Sizdiń Serbııanyń ómirlik mańyzdy ulttyq jáne memlekettik múddesin qorǵaýda, ásirese Kosovoǵa qatysty máselelerdegi berik ustanymyzǵa alǵysymdy bildiremin. Bizdiń aýmaqtyq tutastyǵymyzdy, táýelsizdigimiz ben egemendigimizdi qoldaǵanyńyz úshin úlken rahmetimdi aıtamyn», - dedi Aleksandr Výchıch.

Sonymen qatar Serbııa Prezıdenti eki eldiń arasyndaǵy ekonomıkalyq yntymaqtastyqtyń mańyzdylyǵyn atap ótti.

«Aldaǵy ýaqytta yntymaqtastyǵymyzdy nyǵaıta túsip, taýar aınalymymyzdy arttyratyndyǵymyzǵa senimdimin. Óıtkeni, oǵan áli paıdalanylmaǵan áleýettiń jaqsy irgetasy bar. Sizder taıaý arada Belgradta Qazaqstan Elshiligin ashsańyzdar, qýanyshty bolar edik. Bul bizdiń úlken ótinishimiz», - dedi Serbııa Prezıdenti.

Aıta keteıik, Serbııa basshysy  Qazaqstan Prezıdenti Nursultan Nazarbaevtyń shaqyrýymen resmı saparmen kelip otyr. Búgin mártebeli meıman Aqordada Elbasymen kezdesý ótkizdi.

Kezdesý barysynda Nursultan Nazarbaev Serbııa Prezıdentin «Dostyq» ordenimen marapattady.

Al Aleksandr Výchıch Qazaqstan Prezıdentine óz eliniń eń joǵary nagradasy «Serbııa Respýblıkasy» ordenin tabys etti.

Sapar aıasynda Aleksandr Výchıch Qazaqstan-Serbııa iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady dep josparlanǵan.

Serbııa Prezıdentiniń sapary barysynda birqatar mańyzdy qujattarǵa qol qoıylmaq. Onyń ishinde Qazaqstan men Serbııa úkimetteri arasyndaǵy qylmysqa qarsy kúrestegi yntymaqtastyq týraly kelisim, sondaı-aq Qazaqstannyń Qoǵamdyq damý mınıstrligi men Serbııanyń Jastar saıasaty jáne sport mınıstrligi arasyndaǵy ózara túsinistik týraly memorandým bar.