Serb Respýblıkasynda merziminen buryn prezıdent saılaýy ótedi

ASTANA. KAZINFORM — Serb Respýblıkasynyń burynǵy basshysy Mılorad Dodıktiń qyzmetinen ketýine baılanysty elde merziminen buryn prezıdenttik saılaý ótedi. Ol 23 qarasha kúninen belgilengen, dep habarlaıdy TASS.

Bosnııa jáne Gertsegovına Ortalyq saılaý komıssııasy sot Mılorad Dodıktiń úkimin kúshinde ustap, onyń apellıatsııalyq shaǵymdaryn qabyldamaǵan soń saılaý ótkizýdi uıymdastyrdy.

Saılaý komıssııasynyń málimetinshe, ortalyq saılaý tizimine 1,26 mıllıonnan astam adam engizilgen, onyń 20 500-i shetelde daýys berýge quqyly. Saılaý ýchaskeleri jergilikti ýaqyt boıynsha tańǵy saǵat 7:00–de ashylyp, 19:00–de jabylady. Daýys berý Serb Respýblıkasynda jáne odan tys jerlerde de ótedi. Saılaý ýchaskeleri Belgrad, Berlın jáne Venadaǵy dıplomatııalyq ókildikterinde, sondaı-aq Mıýnhendegi Bas konsýldyqta ashylady. Barlyǵy 2211 saılaý ýchaskesi bar.

Serb Respýblıkasynyń prezıdenttigine 6 úmitker tirkeldi. Bıliktegi Táýelsiz sotsıal-demokrattar alıansy (SNSD) ǵylym jáne tehnologııalyq damý mınıstri jáne burynǵy ishki ister mınıstri Sınısha Karannyń kandıdatýrasyn usyndy. Oppozıtsııanyń basty úmitkeri — Serb Demokratııalyq partııasynan (SDS) úmitker Branko Blanýsha. Sondaı-aq tizimge «Jańa saıasat úshin alıans» partııasynan Dragan Chokanovıch, Serb Respýblıkasynyń Ekologııalyq partııasynan Nıkola Lazarevıch jáne eki táýelsiz kandıdat Igor Gashevıch pen Slavko Dragıchevıch endi. Jeńimpaz 2026 jyldyń qazan aıynda ótetin kezekti saılaýǵa deıin prezıdenttiń mindetin atqarýshy bolady. 

Prezıdent salystyrmaly majorıtarlyq júıe boıynsha saılanady jáne keń ókilettikterge ıe bolady. Ol parlamentke premer-mınıstr jáne Konstıtýtsııalyq sot músheleriniń kandıdatýralaryn usynady, keshirim jasaý quqyǵyn júzege asyrady.

Aıta keteıik, Tanzanııadaǵy prezıdent saılaýynda taǵy da áıel jeńiske jetti.