Serb ınvestorlaryna Qazaqstandaǵy basym salalar usynyldy

ASTANA. KAZINFORM — Qazaqstan men Serbııa agroónerkásip, mashına jasaý, IT, logıstıka, «jasyl» energetıka jáne farmatsevtıka salalarynda yntymaqtastyqty keńeıtýdi kózdep otyr. Bul týraly Qazaqstan–Serbııa Іskerlik keńesiniń alǵashqy otyrysynda QR Saýda jáne ıntegratsııa mınıstri Arman Shaqqalıev málimdedi.

Mınıstrdiń aıtýynsha, Іskerlik keńes eki el kásipkerleri arasyndaǵy turaqty ári ınstıtýtsıonaldyq turǵydan ornyqty baılanys ornatýǵa múmkindik beredi.

— Qazirdiń ózinde yntymaqtastyqtyń naqty negizi qalyptasty: Qazaqstan Serbııaǵa metaldar, astyq, munaı-hımııa ónimderi, mıneraldy tyńaıtqyshtar men azyq-túlik eksporttaıdy. Al Serbııadan mashına jasaý ónimderi, dári-dármek, azyq-túlik taýarlary jáne tehnologııalyq sheshimder ımporttalady, — dedi Arman Shaqqalıev.

Mınıstr basym baǵyttardy atady:

• Agroónerkásiptik keshen jáne tamaq ónerkásibi (qaıta óńdeý, birlesken óndirister, úshinshi naryqtarǵa shyǵý)

• Mashına jasaý jáne komponentter óndirisi

• Tsıfrlandyrý, IT-sheshimder jáne startap-ekojúıe

• Kólik-logıstıka ınfraqurylymy jáne mýltımodaldy dálizder

• Jasyl tehnologııalar, jańartylatyn energetıka jáne energııa tıimdiligi

• Farmatsevtıka jáne medıtsına ónerkásibi

— Qazaqstan serbııalyq ınvestorlarǵa ashyq. Biz qolaıly jaǵdaı usynyp, ashyq ári túsinikti jumys erejelerin, ınstıtýtsıonaldyq qoldaý men birlesken jobalardy iske asyrýǵa keń múmkindikter berýge daıynbyz, — dedi mınıstr.

Eske salsaq, Serbııa Prezıdenti Aleksandr Výchıch Memleket basshysy Qasym-Jomart Toqaevtyń shaqyrýymen 26–27 aqpanda Qazaqstanǵa resmı saparmen keledi.