Sensitive bı ujymy Frantsııadan eki birinshi oryndy alyp keldi
PETROPAVL. KAZINFORM – Estý qabiletinen aıyrylǵan jastardan quralǵan «Sensitive» bı ansambli bedeldi halyqaralyq festıvalde qos birinshi oryndy jeńip aldy.
Soltústik Qazaqstan oblysynyń ákimi Ǵaýez Nurmuhambetov «Sensitive» bı ansambline qurmet kórsetti. Óner ujymy keshe Astanada «Tolqyndy arpalys» atty alǵashqy bı spektaklin usynyp, kórermenniń qoshemetine bólendi.
Al ótken aptada bı ujymy Frantsııa kórermenderin ónerlerine tánti etip, halyqaralyq festıvalde jeńiske jetti.
«Mundaı jetistikterge sizder qajyrly eńbektiń, darynnyń arqasynda jetip otyrsyzdar. Astana turǵyndaryna da ózderińizdiń alǵashqy áleýmettik jobalaryńyzdy, spektaklderińizdi usyndyńyzdar. Ol da kórermenniń joǵary baǵasyn aldy. Elimizde ınklıýzııalyq bilimdi damytýǵa erekshe kóńil bólingen. Erekshelikterińizge qaramastan kóptegen jetistikterge jettińizder. Sizderge sáttilik tileımin», - dedi SQO ákimi.
Ansambl ujymy jáne jetekshisi Olga Rostovşıkova Qurmet gramotalary jáne alǵys hattarmen marapattaldy.
Sensitive bı ansambliniń qurylǵanyna 17 jyl. Osy aralyqta bı ujymy AQSh, Bolgarııa, Italııa, Ispanııa, BAÁ sekildi elderde 17 Gran-prı jáne 37 birinshi oryndy jeńip alǵan. Qazir munda estý qabileti nashar 40 jas óner kórsetip júr.
Buǵan deıin SQO-daǵy eń jas volonter – Tamır Raıymbekov týraly aıtqan edik.
