Sensatsııaǵa toly týr: «Oqjetpes» «Elimaıdy» jeńip, «Qaısar» «Astanadan» upaı oljalady

ASTANA. KAZINFORM - Fýtboldan Premer-lıga komandalary arasyndaǵy Qazaqstan chempıonatynyń jetinshi týry máresine jetti.

Jankúıerler Qyzylordada «Qaısar» men «Astana» kezdesýine kóz tikti. Bıyl qyzylordalyq ujym tek qazaqstandyq fýtbolshylarǵa senim bildirip otyr. Al elordalyq klýb negizinen legıonerlerge úmit artady. Sondyqtan jankúıerler kókeıinde «Qaısar» olarǵa qaýqar kórsete ala ma degen saýal turdy.

Kezdesý barysynda «Astana» oıyn tizginin qolǵa ustaýǵa tyrysty. Dese de oǵan alań ıeleri laıyqty tótep berdi. Oıynnyń 41-mınýtynda elordalyq komandadan Djeffrı Chınedýdiń penaltıden tepken doby qaqpa baǵanasyna tıip, keıin serpildi. Birinshi kezeńde tablodaǵy esep ózgerissiz qaldy. 

Astanalyq komanda ekinshi kezeńdi birden belsendi bastady. Qyzylordalyq klýb qarymta shabýylǵa ıek artty. Osyndaı sátterdiń birinde «Qaısar» shabýylshysy Nurdáýlet Aǵzambaevty elordalyq qorǵaýshylar óz aıyp alańynda shalyp shyqty. Tóreshi belgilegen penaltıdi sheber oryndaı bilgen Aıbar Jaqsylyqov qyzylordalyq klýbty alǵa shyǵardy. 
Oıynnyń 90-mınýtynda «Qaısar» qaqpasyna taǵy bir márte penaltı belgilendi. Odan Nazmı Grıpshı múlt ketpeı, tarazy basyn teńestirdi. Osylaısha komandalar 1:1 esebine qanaǵat bildirdi.

Atalǵan týrdaǵy taǵy bir kezdesýde Kókshetaýdyń «Oqjetpesi» syrt alańda Semeıdiń «Elimaıyn» 2:0 esebimen tize búktirip, sensatsııalyq jeńiske qol jetkizdi.

Al qostanaılyq «Tobyl» óz alańynda Petropavldyń «Qyzyljaryn» 2:1 esebimen súrindirdi.
Sondaı-aq 3 mamyrda «Turan» (Túrkistan) men «Jetisý» (Taldyqorǵan) 0:0 esebine qanaǵat bildirse, «Atyraý» óz alańynda shymkenttik «Ordabasyǵa» 1:2 esebimen jol berdi.

Syrt alańda almatylyq «Qaırat» jezqazǵandyq «Ulytaýdy» 4:1 esebimen jeńse, «Aqtóbe» elordalyq «Jeńisti» 1:0 esebimen tize búktirdi.