Sensatsııa qýǵan keıbir BAQ-tar terrorızmge kómektesip otyr - Amal Abdalla Al-Kýbeısı
ASTANA. QazAqparat - Bilim terrorızmge qarsy kúreste qýatty qural bolatyn edi. Búgin Astanada «Dinder terrorızmge qarsy» atty halyqaralyq konferentsııa barysynda sóz sóılegen Birikken Arab Ámirlikteri Federaldy ulttyq keńesiniń tóraıymy doktor Amal Abdalla Al-Kýbeısı osylaı málimdedi.
Spıkerdiń aıtýynsha, terrorızmmen kúreste kedeılik pen bilimsizdiktiń aldyn alý úlken ról atqarady. «Terrorıstik uıym negizinen kedeılik shegi sharyqtaǵan óńirlerde beleń alady. Bilimsizdikke keletin bolsaq, bunyń da qaterdi arttyrýdaǵy róli zor. Árıne, bilim tek mektepte ǵana emes, úıde de, dalada da, telearnalarda da, ınternette de berilip jatyr. Degenmen, ol qandaı bilim? Áleýmettik jeliler arqyly taralatyn bilim de buǵan óz úlesin qosýda. Osyǵan qatysty biz dindi aǵartýshylyq arqyly túsindiretin keń aýqymdy bilim keshenine kirisýge tıispiz», - dedi AmalAbdalla.
Onyń aıtýynsha, terrorızmge qarsy bilim júıesin damytý úlken jigerdi, ortaq sharalar keshenin qajet etedi. «Ekstremısterdiń daýysy sanaly, bilimdi dinıeleriniń daýysynan da qatty shyǵýyna jol bermeýge tıispiz. Bul rette Taıaý Shyǵystaǵy terrorızmniń ıslamǵa úsh qaınasa sorpasy qosylmaıtynyn erekshe ataǵym keledi. Islam ashyq ómir súrýge shaqyryp, beıbitshilik pen syılastyqty, adamzat, dinder arasyndaǵy ózara qurmetti dáripteıdi. Islam - mahabbat pen súıispenshilik dini. «Ustamdy ıslam» nemese «radıkaldy ıslam» degen uǵym joq. Bir ǵana ıslam bar, ol álemdegi eń keshirimdi, eń kórkem ıslam», dedi mártebeli meıman.
Budan bólek, Amal Abdalla keıbir buqaralyq aqparat quraldary ádeıi istemese de terrorızmge kómektesip jatqanyn atap ótti. «Keıbir BAQ sensatsııa qýyp, aqparatty durys ashyp kórsetpeýi arqyly teris áserge urynyp otyr. Osyny da oılanýǵa tıispiz», - dedi ol.
