Senimdi qajylyq. Alaıaq týrfırmalarǵa qalaı tap bolmaýǵa bolady

ASTANA. KAZINFORM — ІІM týrfırmalar arqyly umra men qajylyqqa barý kezinde qalaı alaıaqtyqtyń aldyn alýǵa bolatynyn aıtyp berdi.

— Qazaqstan ІІM azamattarǵa umra men qajylyqty týrfırmalar arqyly uıymdastyrý kezinde kezdesýi múmkin alaıaqtyq týraly eskertedi. Qasıetti sapardy uıymdastyrýda senimdi kompanııany tańdaý mańyzdy, — dep atap ótti vedomstvo baspasóz qyzmeti.

Alaıaqtardyń aılasyna túsip, aqshadan aıyrylyp qalmas úshin tómendegi saqtyq sharalaryn ustaný qajet: 

— Fırmanyń lıtsenzııasyn jáne ol týraly pikirlerdi tekserińiz. Mundaı saparlardy uıymdastyrýmen aınalysatyn resmı týrıstik fırmalardyń memlekettik lıtsenzııasy bolýy kerek. Klıentterdiń pikirlerin zertteńiz. Týroperatorlar ár týrıstke týrkod usynýy tıis.

— Tym tómen baǵaǵa qyzyǵyp, aldanyp qalmańyz. Eger sizdi tómen baǵamen qyzyqtyrsa, asyqpańyz, mundaı usynystar kóbinese alaıaqtyqpen baılanysty bolýy múmkin. Túrli týrfırmalardyń baǵalaryn salystyryp, olardyń naryqtyq baǵaǵa sáıkestigin anyqtap alǵanyńyz jón.

— Qujattar men kelisimshartty tekserińiz. Barlyq kelisimsharttardy muqııat oqyp shyǵyńyz. Árbir tarmaqqa jiti nazar aýdaryńyz, bul keleńsiz jaǵdaılardyń aldyn alýǵa kómektesedi. Eger sizge bir nárse túsiniksiz bolsa, mamanmen keńesýdi umytpańyz.

— Baılanys derekterine nazar aýdaryńyz. Senimdi týrfırmanyń árqashan baılanys telefony, elektrondy poshtasy jáne naqty mekenjaıy bolady. Alaıaqtar kóbinese baılanys derekterin kórsetpeı, vırtýaldy paraqshalardyń artynda jasyrynýy múmkin.

— Týr baǵdarlamasyn muqııat zerdeleńiz. Týrdyń qunyna ne kiretinin anyqtańyz (ushý, turǵyn úı, kólik, tamaqtaný, medıtsınalyq saqtandyrý jáne basqa qyzmetter). Barlyq qajetti shyǵyndardyń eskerilgenine jáne kezdeısoq tólemderdiń bolmaıtynyna kóz jetkizińiz.

Osyǵan deıin Almatyda qajylyqqa baılanysty 180 adamdy aldaǵan kúdiktige baılanysty tergeý júrip jatqanyn jazdyq.