Senim dáýiri jáne jańa arhıtektýra: Almatyda aýqymdy Central Asia Fintech Summit 2026 ótti

2026 jyly sammıtke bank, fınteh-kompanııalar, memlekettik organdar basshylary men halyqaralyq sarapshylardy qosa alǵanda, 4 000-nan astam qatysýshy jınaldy. Bıylǵy sammıttiń taqyryby – «Senim dáýiri: kelesi onjyldyqta qarjy naryǵy qandaı bolady?»

Jańa arhıtektýra jáne naryqty keńeıtý

-Tsıfrlyq tehnologııalar qarjy naryǵynyń qurylymyn túbegeıli ózgertý ústinde: jańa qatysýshylar, ınvestıtsııalaý quraldary men esep aıyrysý tásilderi paıda bolyp jatyr. Sonymen qatar retteýshiniń róli de ózgerip keledi – bizden aldyn ala áreket etýdi, ınnovatsııalar men básekelestikke jaǵdaı jasaýdy, sonymen birge qarjy júıesiniń senimdiligi men oǵan degen senimdi qamtamasyz etýdi talap etedi, – dedi QR Ulttyq bankiniń tóraǵasy Tımýr Súleımenov.

Sammıt aıasynda Qazaqstannyń tólem naryǵynyń jańa arhıtektýrasy tanystyryldy. 2026 jylǵy qazan aıynan bastap qarjy naryǵynda retteýdiń jańa sýbektisi – birinshi sanattaǵy tólem uıymdary paıda bolady. Olar Ulttyq banktiń lıtsenzııasy negizinde jumys istep, tólem qyzmetterin banktik operatsııalardyń jekelegen túrlerimen qatar usyna alady.

Ashyq plenarlyq sessııa barysynda qatysýshylar naryqtaǵy qatysýshylar aýqymyn maqsatty túrde keńeıtý jáne ınfraqurylymǵa teń qoljetimdilikti qamtamasyz etý naryqtaǵy salaýatty básekelestikti kúsheıtýge baǵyttalǵanyn atap ótti. Jańa oıynshylardyń paıda bolýy qarjy sektorynyń damýyn jedeldetip, jańa quzyretterdiń kelýine jol ashyp, bankter men tehnologııalyq kompanııalar arasyndaǵy ózara tıimdi seriktestiktiń qosymsha múmkindikterin qalyptastyrady dep kútiledi.

Jańa qatysýshylar tólem naryǵy men tsıfrlyq aktıvter naryǵy arasynda retteletin arna qyzmetin de atqaratyn bolady. Bul rette olar úshin kapıtalǵa, tsıfrlyq ınfraqurylymǵa jáne aqparattyq qaýipsizdikke qoıylatyn kúsheıtilgen talaptar qarastyrylǵan.

Ulttyq tsıfrlyq ınfraqurylym is júzinde

Naryqtaǵy jańa qatysýshylardyń damýy Qazaqstannyń qarjylyq ınfraqurylymyn keń aýqymdy transformatsııalaýdyń jalǵasy boldy. Sammıtte búginde elimizde Ulttyq tsıfrlyq qarjy ınfraqurylymynyń barlyq negizgi komponentteri – bankaralyq tólemder, tsıfrlyq teńge, bıometrııa jáne qarjylyq alaıaqtyqqa qarsy is-qımyl quraldary tabysty jumys istep jatqany atap ótildi.

Jyldyń mańyzdy nátıjeleriniń biri – Bankaralyq mobıldi tólemder júıesiniń iske qosylýy. 19 shildeden bastap telefon nómiri boıynsha aýdarymdar jáne Biryńǵaı QR arqyly 20 mln-nan astam tranzaktsııa jasalyp, olardyń jalpy somasy shamamen 400 mlrd teńgeni qurady. Sonymen qatar tsıfrlyq teńgeni damytý jumystary júrip jatyr: 2026–2027 jyldary onymen jasalatyn operatsııalar kólemi 2 trln teńge deńgeıinde bolady dep kútiledi. Ulttyq banktiń ónerkásiptik paıdalanýǵa engizilgen júıelerinde jasandy ıntellekt negizindegi onnan astam sheshim qazirdiń ózinde jumys istep tur.

Tsıfrlyq aktıvter naryǵy da belsendi damyp keledi: retteýshilik qumsalǵyshta 34 joba iske asyrylyp jatyr, al Ulttyq krıptorezervke 700 mln AQSh dollary bólindi.

Qaýipsizdik – salalyq standart

Baǵdarlamanyń jarqyn oqıǵalarynyń biri paıdalanýshylardy qorǵaý salasyndaǵy ındýstrııanyń naqty jetistikterin kórsetken National Antifraud Awards 2026 marapattaý rásimi boldy. Qazirdiń ózinde 270-ten astam qatysýshyny biriktirgen Ulttyq Antıfrod-ortalyǵy ekojúıelik tásildiń joǵary nátıjeliligin kórsetti: 2026 jylǵy 1 qyrkúıektegi jaǵdaı boıynsha onyń jumysynyń arqasynda 127 mlrd teńge somasyndaǵy alaıaqtyq operatsııalardyń ýaqytyly joly kesildi.

Syılyq uıymdastyrýshylary úshin bul antıfrod júıesiniń tıimdi jalpyulttyq qaýipsizdik ınstıtýtyna aınalǵanynyń negizgi dáleli.

Innovatsııalardy qoldaý jáne jańa seriktestikter

Sammıt barysynda Qazaqstannyń fınteh-startaptaryna arnalǵan Fintech Stars Battle baıqaýynyń da qorytyndysy shyǵaryldy. Bul pıtch-sessııa aıasynda bankırlerden, venchýrlik qorlardan jáne IT-kompanııalardan quralǵan qazylar alqasy blokcheın, jasandy ıntellekt, tólem júıeleri, tsıfrlyq sáıkestendirý jáne ashyq bankıng salalaryndaǵy sheshimderdi baǵalaıdy.

Fintech Stars Battle 2026 baıqaýynyń bas júldegeri jáne White Hill Capital kompanııasynan SAFE sharty boıynsha 100 000 AQSh dollaryna deıin ınvestıtsııa alǵan joba – SHART RATE. Bul qaýipsiz onlaın mámileler jasaýǵa arnalǵan tsıfrlyq platforma. Ol azamattar men bızneske zańdy kúshi bar sharttardy birneshe mınýt ishinde jasaýǵa jáne shart talaptary buzylǵan jaǵdaıda sot sheshimin jedel alýǵa múmkindik beredi.

Basqa da fınalıster seriktesterden mańyzdy júldelerge ıe boldy. BEHYPE jobasy (CEO – Aıgerim Beısembına), ınflıýenser-marketıng platformasy men blogerlerge arnalǵan fınteh-kartany damytyp kele jatqan joba retinde, Tumar Innovation Hub uıymdastyrǵan Dýbaıdaǵy akseleratsııalyq baǵdarlamaǵa qatysý múmkindigin jeńip aldy. BYTRADER startapy (CEO – Mýslım Abdýllaev) AI quraldary men táýekelderdi basqarý fýnktsııalary bar saýda termınalyn usynyp, Yandex Cloud kompanııasynan 6 mln teńge kóleminde grantqa ıe boldy.

-Bul baıqaý aıasyndaǵy negizgi mindetimiz – komandalarǵa naryqtyń jetekshi oıynshylarynan kapıtal men beıindi saraptamaǵa tikeleı qoljetimdilik berý. Pıtch-sessııa nátıjeleri óńirde suranysqa ıe ári qaýipsiz qarjylyq tehnologııalardy ázirleýge qabiletti myqty komandalar men ázirleýshiler bar ekenin kórsetti, – dep atap ótti Dıas Savetkanov, Kazakhstan Fintech Network bas dırektory.

Central Asia Fintech Summit aıasyndaǵy pikirtalastardyń praktıkalyq jalǵasy jańa halyqaralyq kelisimder boldy. Іs-shara barysynda halyqaralyq Tether jáne VEON kompanııalarymen eldiń tehnologııalyq jáne qarjy naryqtarynda jańa birlesken jobalardy pysyqtaýǵa baǵyttalǵan ózara túsinistik týraly memorandýmdarǵa qol qoıyldy.

Transshekaralyq servısterdi damytý jáne Ortalyq Azııadaǵy qarjylyq ıntegratsııany nyǵaıtý jolyndaǵy mańyzdy qadam Qazaqstan Respýblıkasy Ulttyq bankiniń Ulttyq tólem korporatsııasy men Ózbekstannyń ulttyq tólem júıesi HUMO arasynda Ózara túsinistik jáne áriptestik týraly memorandýmǵa qol qoıý boldy.

Qujat ulttyq QR-kodtardy ózara ekvaırıng jasaýǵa negiz qalaıdy: Ózbekstan azamattary Qazaqstanda taýarlar men qyzmetter úshin qazaqstandyq ulttyq QR arqyly tólem jasaı alady, al qazaqstandyqtar Ózbekstanda biryńǵaı ulttyq UzQR júıesi arqyly tólem júrgize alady. Budan bólek, taraptar eki el paıdalanýshylary arasynda bankterdiń úırenshikti mobıldi qosymshalaryn paıdalana otyryp, aýdarymdar júıesin damytýdy josparlap otyr.

«Ulttyq tólem korporatsııasy» AQ Basqarma tóraǵasy Janar Samaeva atap ótkendeı, seriktestiktiń negizgi maqsaty – tólem servısteri paıdalanýshylar úshin qolaıly, qaýipsiz ári ulttyq ınfraqurylymdar deńgeıinde ózara úılesimdi bolatyn tehnologııalyq jaǵdaı qalyptastyrý.

Óz kezeginde HUMO Basqarma tóraǵasy Aleksandr Sotnıkov bul jobanyń óńirdegi transshekaralyq tólem sheshimderin damytýdaǵy mańyzdy qadam ekenin atap ótti.

Aıta keteıik, Central Asia Fintech Summit (CAFS) 2026 – óńirdiń qarjy jáne tehnologııa sektorlarynyń negizgi is-sharasy. Ol tsıfrlyq ekonomıkanyń jáne qarjy naryǵynyń bolashaǵyn talqylaý úshin bank sektorynyń top-menedjerlerin, memlekettik sektor ókilderin jáne fınteh-kompanııalardy biriktiredi.

Osyǵan deıin Qazaqstan jyl sońyna deıin Qytaımen shekaraaralyq QR tólemderin iske qosatyny týraly jazdyq.