«Seniń jańa qyryń» sporttyq aktsııasyn astanalyq fýtbolshylar da qoldady
ASTANA. QazAqparat - «Seniń jańa qyryń» sporttyq aktsııasyn astanalyq fýtbolshylar da qoldady, dep habarlaıdy QazAqparat QR Tuńǵysh Prezıdenti Qorynyń baspasóz qyzmetine silteme jasap.
Halyqaralyq balalardy qorǵaý kúniniń qarsańynda «Seniń jańa qyryń» respýblıkalyq chellendjin qoldaý maqsatynda QR Tuńǵysh Prezıdenti Qorynyń fýtbol komandasynyń oıynshylary Aqmola oblysy Aqkól aýdanynyń Erekshe bilim berý qajettiligi bar balalarǵa arnalǵan № 1 balalar úıiniń tárbıelenýshilerine fýtbol boıynsha jattyǵýlar men sheberlik sabaqtaryn ótkizdi.
Sporttyq is-shara jappaı jattyǵýdan bastaldy. Ony QR Tuńǵysh Prezıdenti Qorynyń fýtbol komandasynyń jattyqtyrýshysy, Qazaqstannyń fýtbol boıynsha chempıony, QR sport sheberi, birinshi lıgadaǵy «Qazaqstannyń 2012 jylǵy eń úzdik fýtbolshysy» Dıdar Sydyqbek ótkizdi.
Odan keıin fýtbol jáne fýtbol frıstaıly boıynsha sheberlik sabaǵy ótti, onda balalarǵa fýtboldy kásibı oınaýdy, álemdik fýtbol juldyzdarynyń fırmalyq aılalarynyń qupııalaryn ashty. Qazaqstannyń Fýtbol frıstaıly federatsııasynyń sportshylary Ernur Amanbaev jáne Nursultan Qaıyrjan ózderiniń tájirıbelerimen bólisti.
Motıvatsııalyq kezdesý barysynda balalar «Astana» FK oıynshylary Dııar Júginis pen Artem Tsoımen, QR Tuńǵysh Prezıdent Qorynyń fýtbol komandasynyń legıoneri Vıktor Nvalor Okechýýmen sýretke tústi.
Balalardyń ótinishi boıynsha jas fýtbolshylar men astanalyq sport maıtalmandarynyń arasynda joldastyq match ótkizildi.
QR Tuńǵysh Prezıdenti Qorynyń fýtbol komandasynyń jattyqtyrýshysy Dıdar Sydyqbek: «Seniń jańa qyryń» sporttyq atsııasynyń maqsaty - dene tárbıesi men salaýatty ómir saltyn nasıhattaý bolyp tabylady. Memleket basshysy bul bastamaǵa qoldaý kórsetti. Aktsııa aıasynda búkil Qazaqstan boıynsha ataqty sportshylar, mádenıet qaıratkerleri ashyq jattyǵýlar ótkizýde. Olar ózderiniń úlgisimen qazaqstandyqtardy sportpen shuǵyldanýǵa shaqyrady. Bizdiń komanda da osy aktsııany qoldaýdy jáne ony Astanada emes, shaǵyn aýdanda bastaýdy uıǵardy. Sportta shek joq. Qazaqstanda balalar sporty jaqsy damyp keledi, sonymen birge ınklıýzıvtik sporttyq tárbıeleýge de kóńil bólý qajet. Taıaýda QR Tuńǵysh Prezıdentiniń Qory ekinshi respýblıkalyq balalarǵa arnalǵan paralımpııalyq starttaryn ótkizdi. Búgin biz balalarǵa arnaǵan sheberlik sabaǵyn ótkizý úshin keldik. Bizdiń kezdesýimiz Aqkól aýdanynyń jas fýtbolshylaryna jaqsy tájirıbe bolady degen senimdemiz»,-dedi.
Sonymen qatar, QR Tuńǵysh Prezıdenti Qorynyń fýtbol komandasy Astana qalasyndaǵy barlyq fýtbolsúıer qaýymǵa 21 kún boıy ashyq sabaq ótkizedi.
Balalardyń aıtýynsha, bir alańda kásibı sportshylarmen dop oınaý óte qyzyqty.
«Biz bar kúshimizdi salyp oınadyq jáne oıynnyń sońynda astanalyq fýtbolshylar bizdi maqtady. Tamasha boldy», -dep bólisti ózderiniń áserimen jas fýtbolshylar.
Іs-shara QR Tuńǵysh Prezıdenti Qorynyń atynan Balalar úıiniń tárbıelenýshilerine syılyqtar tabys etýmen aıaqtaldy. Balalarǵa sporttyq jabdyqtar men sport kıimderi tartý etildi.
