«Seniń tańdaýyń» atty jańa respýblıkalyq qoǵamdyq qozǵalys jumysyn bastady
ALMATY. 13 qyrkúıek. QazAqparat /Ádilet Musahaev/ - "Elimizde keı jaǵdaıda zańdar saqtala bermeıdi. Osy turǵyda 18 jasqa tolmaǵandarǵa temeki satatyndarmen kúresý úshin atalǵan jobany qolǵa alyp otyrmyz", -
dep málimdedi «Baýyrjan» qorynyń prezıdenti Juldyz Omarbekova Almatyda arnaıy ótken baspasóz máslıhatynda.
Onyń aıtýynsha, 10 jylǵa josparlanǵan bul jobada ár jyl saıyn túrli taqyryptarda máseleler kóterilip, ony sheshý baǵytynda jumystar atqarylmaq. «Qazirgi kúni jastar temekini dúkenderden esh qıyndyqsyz ala alady. Sol úshin biz dúken satýshylaryna kámelettik jasqa tolmaǵandarǵa temeki satýǵa bolmaıtyndyǵyn jáne QR zańyn saqtaý baǵytynda túsindirý jumystaryn júrgizemiz. Máselen, shetelde temeki alýǵa kelgen adamnan satýshy birinshi kezekte jeke kýáligin suraıdy, mine bul úrdisti Qazaqstanda da qalyptastyrýǵa ábden bolady», -deıdi J.Omarbekova.
Sonymen qatar ol jańadan qurylǵan qozǵalys qyrkúıek, qazan aılarynda dúken-sórelerdiń satýshylaryna aqparattyq málimetterdi berýmen aınalysatyndyǵyn jetkizdi. «Bizdiń qoǵamda kámelettik jasqa tolmaǵan balasyn temekige jumsaıtyn ata-analar da kezdesedi. Olar úshin, «Biz 18 jasqa tolmaǵandarǵa shylym satpaımyz, biz QR-nyń zańyn saqtaımyz» degen uranmen jazylǵan kartochkalardy ázirledik», -deıdi «Baýyrjan» qorynyń prezıdenti.
«Seniń tańdaýyń» qozǵalysy saýalnama júrgizý arqyly saýda oryndarynyń úshten bir bóligi jasóspirimderge temeki satatyndyǵyn anyqtaǵan. Almaty qalasyndaǵy saýda ortalyqtarynyń 40 paıyzy «Temeki shegýdi shekteý týraly» Zańnyń saqtalý-saqtalmaýyna oraı tekserilmegen eken. Jalpy qazirgi tańda Almaty qalasynda 6 myń saýda orny bar kórinedi, al atalǵan qozǵalystyń eriktileri kúnine 68 dúkendi tekserip úlgeretindikterin aıtady.
«Bizdiń qozǵalystyń músheleri men qalalyq ІІD-niń qyzmetkerleri birlese otyryp, aıyna bir ret dúkenderge tekserý jumystaryn júrgizedi. Eger jasóspirimge temeki satylǵan jaǵdaı anyqtalsa, satýshyǵa 70-ten 200 myń teńgege deıingi aralyqta aıyppul salynady. Sonymen qatar júrgizilgen tekserýlerdiń nátıjesinde balalarǵa temeki satpaǵan satýshylardy marapattaıtyn bolamyz», -dep atap ótti Juldyz Omarbekova.
«Qazirgi kúni ІІD óz jumysyn qoǵamdyq uıymdarmen birlese atqarýda. Zańnyń saqtalýyn túsindirý baǵytyndaǵy bul qozǵalystyń kóterip otyrǵan bastamasy óte oryndy dep bilemin», -deıdi Almaty qalalyq ІІD-niń qoǵamdyq qaýipsizdik basqarmasy bastyǵynyń orynbasary polıtsııa polkovnıgi Aıgúl Shópshekbaeva.
