«Seniń kúniń, Donor!» qaıyrymdylyq jobasy barysynda almatylyqtar 1096,2 lıtr qan tapsyrdy
Ony «Baýyrjan» qaıyrymdylyq qory, «Ómir tamshysy» qoǵamdyq birlestigi jáne «KaR-Tel» JShS-i birlesip uıymdastyrǵan bolatyn. Buryn tek Almaty qalasynda ótip kelgen bul sharada bıyl Almatydan bólek Astana, Aqtóbe, Shymkent, Qaraǵandy, Qyzylorda, Óskemen, Semeı, Pavlodar jáne Qyzyljar qalalary da qamtylǵan edi.
«Biz is-shara bastalýy aldynda aldymyzǵa 1 myń lıtr qan jınaýdy maqsat etip qoıdyq. Qazirgi kezde bul maqsatqa qol jetkizip qana qoımaı, mejeden edáýir asyp, 3000 lıtr qan jáne onyń quramyndaǵy komponentterdi jınadyq. Bizdiń eńbegimiz zaıa ketpedi. Osy aktsııadan qalys qalmaı, belsendi atsalysqan adamdarǵa rızashylyǵymyz sheksiz», - deıdi «Baýyrjan» qaıyrymdylyq qorynyń prezıdenti Juldyz Omarbekova. Onyń aıtýynsha, «Seniń kúniń, Donor!» is-sharasyna 6 myńnan astam adam qatysty. Olardyń eń jasy 18-de bolsa, eń úlkeni - 67 jasta boldy. Onda erkekter arasynda donorlardyń 71 paıyzyn 18-30 jastaǵylar, 21 paıyzyn 41-50 jastaǵylar, 7 paıyzyn 51-60 jastaǵylar, 1 paıyzyn 60-tan joǵarǵylar quraǵan. Al áıelder arasyndaǵy donorlardyń 57 paıyzyn 18-30 jastaǵylar, 25 paıyzyn 41-50 jastaǵylar, 18 paıyzyn 51-60 jastaǵylar berip otyr.
«Atqarylǵan bul is-shara arqyly Qazaqstandaǵy donorlyq máselesinyń mańyzdylyǵyna qoǵamnyń nazary aýdaryldy. Damyǵan elderde qannyń 94 paıyzy tegin tapsyrylady. «Seniń kúniń, Donor!» sııaqty jobalar nátıjesinde qazaqstandyq donorlardyń qatary aldaǵy ýaqytta budan da arta túsedi dep oılaımyn. Donorlyq qannyń jetispeýi búkil Qazaqstan úshin kókeıkesti máseleniń biri bolyp tabylady», - deıdi Respýblıkalyq Qan ortalyǵynyń dırektory Dılıaver Bekırov.
Jalpy bul jobany júzege asyrý kezinde almatylyqtar - 1096,2 lıtr, aqtóbelikter - 587 lıtr, qaraǵandylyqtar - 345 lıtr, semeılikter - 324 lıtr, shymkentikter - 255 lıtr, qyzylordalyqtar - 213,886 lıtr, óskemendikter - 195, 75 lıtr, astanaldyqtar - 114 lıtr qan tapsyrǵan kórinedi.