Senbilikke árkim óz erkimen qatysýy kerek - Alık Shpekbaev

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev jumysshylardy, eger basshylyq senbilikke májbúrlese, vedomstvoǵa habarlasýǵa shaqyrdy, dep habarlaıdy QazAqparat tilshisi.

Búgin elektrondyq úkimet portalyndaǵy ınternet-konferentsııada Rýslan Atashev esimdi paıdalanýshy agenttik basshysyna senbilikterge jumyldyrýdyń zańǵa qanshalyqty saı keletindigi týraly suraq qoıdy.

Alık Shpekbaev memlekettik qyzmetshiler senbilikterge tek erikti túrde baratynyn aıtyp, bireý májbúrlegen jaǵdaıda agenttikke habar berýge shaqyrdy. «Memlekettik qyzmetshilerdi senbi kúnderi eldi mekenderdi sanıtarlyq tazalaý jumystaryna (senbilikterge) jumyldyrý erikti túrde iske asyrylady. Demalys kúnderi májbúrlep jumysqa shaqyrylǵan memqyzmetshi agenttikke nemese onyń sol óńirdegi aýmaqtyq bólimshesine jazbasha shaǵym túsire alady», - dedi Alık Shpekbaev.