Senbilik kúni Almatyda 135 shaqyrym aryq júıesi men 34 shaqyrym kishi ózender arnalaryna sanıtarlyq tazalaý jumystary júrgizildi
ALMATY. 11 sáýir. QazAqparat /Názıra Eleýhan/ - Almatyda ótken senbi kúni kólemi 2567 tekshe metr qoqys arnaıy polıgonǵa shyǵarylyp, 135 shaqyrym aryq júıesi qoqys pen topyraqtan tazartyldy, 34 shaqyrymdaı qalanyń kishi ózenderiniń arnalary men jaǵalaýlarynda da sanıtarlyq tazalaý jumystary júrgizildi.
Jalpyqalalyq senbilikke 220 myń adam qatysyp, kommýnaldyq arnaıy tehnıkadan basqa da 343 birlik tehnıka jumyldyryldy, dep habarlaıdy Almaty ákimdiginiń baspasóz qyzmeti.
«Bunymen qatar, bul kúni aýlaaralyq aýmaqtarǵa, kópshilik demalatyn oryndar men bos jatqan alańdarǵa sanıtarlyq tazalaý jumystary, aǵashtardy ákteý, jasyl jelekter otyrǵyzý jumystary júrgizildi. Aýdan ákimdikteri ár bekitilgen aýmaqtarda tazalaý jumystaryn uıymdastyryp ótkizdi. Jeke páter ıeleriniń kooperatıvterimen birlese otyryp, ózderine qarasty jáne aýla aýmaqtarynda turǵyndardyń jáne kondomınımýmnyń nysandarynda ornalasqan zańdy tulǵalardyń qatysýymen tazalaý jumystary uıymdastyryldy. Aýdan ákimdikterimen jappaı jumys oryndarynda merekelik ahýal qalyptastyryldy, senbilikke qatysýshylar qajetti mólsherde qural-saımandarmen, basqa da kerek-jaraqtarmen qamtamasyz etildi»,-delingen habarlamada.
