Senbilik kezinde asarlatyp, bireýge úı turǵyzyp bereıik - tarıxshy Qashqymbaev
ASTANA. QazAqparat - QR Bilim jáne ǵylym mınıstrliginiń Memleket tarıxy ınstıtýty dırektorynyń orynbasary, tarıxshy ǵalym Amankeldi Qashqymbaev senbilikti ótetin kúndi qazaqtyń "asar" atty ulttyq dástúri úlgisinde ótkizýdi usyndy, dep xabarlaıdy QazAqparat tilshisi.
"Men oılaımyn, búginde "senbilik" degen sharanyń túpki maqsatyn anyqtap alýymyz qajet. Óıtkeni qazirgi kezde bizdiń uıymdastyryp júrgen senbilikterimiz keıde túkke turǵysyz sharaǵa aınalyp ketedi. Máselen, biz 20-30 adamdy alyp baramyz da, kóshe sypyramyz. Ol neǵylǵan senbilik? Al maǵan senbilikke shyǵaıyq, bir jerge baryp, aǵash otyrǵyzaıyq, ıa bolmasa, bireýge kómek jasaıyq dese, men qýana-qýana keliser edim. Óıtkeni men óz úlesimdi qosqanymdy túsinemin. Sosyn myńdaǵan stýdentterdi shyǵaryp, temeki tuqylyn jınatqyzyp qoıamyz. Men keıde bylaı aıtamyn, anaý temekini tastaıtyn kim? Temeki shegetin ata-ana. Al erteń ony jınaıtyn kim? Sol ata-ananyń balalary. Osyny jetkizý kerek. Sondyqtan senbilikti tek kúl-qoqys jınaýdyń sharasy emes, qazaqtyń "asar" sııaqty ulttyq dástúri retinde keńinen ótkizgen jón. Mysaly, buryn aýylda "asardy" jıi jasaıtyn. Asar deıdi de, bireýdiń úıin salyp beredi. Kelesi joly taǵy bireýdiń úıin turǵyzady. Mine, bizdiń ulttyq bolmysymyz saı senbilik degen osyndaı bolýy kerek", - deıdi Qashqymbaev.
Osy oraıda ǵalym qazaqtyń "kóp túkirse kól" degen naqyl sózin keltirip, árbir ujym asarlatyp bir úıge kómektesse, ulttyq sanamyz ósip, tárbıelik máni bar sharalar kóbeıetin edi dep sanaıdy.
