Senbide eldiń basym aýmaǵynda qar men jańbyr, kúshti jel, tuman jáne kóktaıǵaq bolady dep kútilýde
TANA. 29 qazan. QazAqparat - «Qazgıdromettiń» boljaýynsha, senbi, 29 qazan kúni Qazaqstannyń basym aýmaǵynyń aýa raıyn atmosferalyq aǵyndarmen baılanysty sýyq tsıklon qalyptastyrady.
Soǵan oraı, jekelegen jerlerde qar men jańbyr túrinde jaýyn-shashyn bolady, eldiń ońtústik-shyǵysynda jaýyn molynan túsedi. Sondaı-aq, jel kúsheıip, keı aýmaqtardy tuman basady, joldarda kóktaıǵaq bolady dep kútilýde.
Taratylǵan habarlamaǵa súıensek, Soltústik Qazaqstan, Aqmola, Qaraǵandy, Pavlodar, Shyǵys Qazaqstan, Qyzylorda, kúndiz Aqtóbe oblystarynyń keı óńirlerinde jeldiń ekpini 15-20 m/s-qa deıin kóteriledi.
Mańǵystaý men Almaty oblystarynda - tumandy.
Ońtústik Qazaqstan men Jambyl oblystarynda jeldiń jyldamdyǵy sekýndyna 15-20 metrge deıin kúsheıedi. Jambyl óńirinde sondaı-aq, tuman men kóktaıǵaq boljanýda.
Bolmashy kóktaıǵaqtar sonymen birge, Qostanaı oblysynyń jekelegen aýmaqtarynda da kútilýde.
Al gıdrologııalyq boljamdarǵa sáıkes, aldaǵy úsh táýlikte Qazaqstannyń sýly nysandarynda sý betiniń salqyndaýy baıqalady.
Eldiń soltústigindegi kishigirim ózenderde alǵashqy muz qatparlary paıda bolady.
Shyǵys Qazaqstan oblysynyń jekelegen taýly ózenderinde jaýyn-shashynǵa baılanysty sýdyń kólemi ulǵaısa, respýblıkanyń ońtústik jáne ońtústik-shyǵysyndaǵy taýly ózenderde sý kóleminiń aýytqýy baıqalady.
