Senbi men jeksenbini asyǵa kútetin sanany ózgertý kerek - akademık Qazkenov
ASTANA. QazAqparat - Barlyq qazaqstandyqtardyń jumysqa degen kózqarasy ózgergen jaǵdaıda ǵana qoǵamdyq sana jańǵyrý úderisinen ótti deýge bolady.
Mundaı pikirdi búgin Astanada akademık Qazbek Qazkenov bildirdi, dep habarlaıdy QazAqparat tilshisi.
«Ashyǵyn aıtaıyq, qazirgi kezde barlyǵymyz jumysta júrgende senbi men jeksenbini asyǵa kútemiz. «Dúısenbi bolsa eken» dep júretinder joq qoı. Ol bizge ǵana emes, barsha adamzatqa tán problema.Ony eshqandaı normatıvtik aktilermen túzete almaısyń. Adam shyn kóńilmen jumys istemeıdi. Biz «Jalpyǵy ortaq Eńbek Qoǵamy» degen jaqsy bastamany kótergen edik. Ony da umytpaý qajet. Biz túriktiń Súleımanyn talqylaýdy qoıyp, Bıl Geıtstiń jetistikke qalaı jetkenine kóz jetkizýimiz kerek»,- dedi Qazkenov Astanada ótken jıynda.
Akademıktiń aıtýynsha, halyqtyń sanasyn ózgertýge bolady. Tarıhta ondaı mysaldar az emes. «Kezinde Mahatma Gandı jalǵyz ózi halyqtyń sanasyn ózgertem degende búkil Úndistan, Eýropa men Ulybrıtanııa kúldi. Alaıda bir jyldan keıin ol ındýstardyń sanasyn ózgertti. Aǵylshyndar elden ketýge májbúr boldy. Mao Tszedýnnyń tusynda túrmede eki ret otyryp shyqqan Den Sıaopındi alaıyq, ol 1 mlrd. 300 mln. qytaılyqtyń sanasyn ózgertti. Ol halyqtyń mentalıtetin ózgertti, naryqtyq zamanǵa beıimdelýge kómektesti», - dep atap kórsetti fılosof ǵalym.
