Demalys kúnderi elordada qandaı mádenı sharalar ótedi

Murajaı afıshasy

QR Ulttyq murajaıynda «Usta murasy: sheberlik pen dástúr» atty kórme ótedi. Ekspozıtsııada XVIII–XIX ǵasyrlar men XX ǵasyrdyń basyna jatatyn qazaqtyń dástúrli turmys mádenıeti, batyrlyq dástúri jáne zergerlik ónerin beıneleıtin 60-qa jýyq jádiger qoıylǵan. Aǵash, teri, súıek, múıiz jáne metaldan jasalǵan turmystyq buıymdar, zergerlik áshekeıler, batyrlardyń qarý-jaraqtary men at ábzelderi kórermen nazaryna usynylǵan. Sonymen qatar «Taldy-2» qorǵanynan (b.z.d. VII–VI ǵasyrlar) tabylǵan at ábzelderiniń rekonstrýktsııasy da kópshilikke kórsetiledi. Ekspozıtsııanyń negizin qolóner sheberi ári restavrator Erǵazy Isataevtyń jeke kollektsııasy men mýzeı qoryndaǵy qundy jádigerler quraıdy.

Odan bólek, Tellýrııalyq yrǵaqtar men toǵysqan estelikter atty kórmede sýretshi ári kompozıtor Hvan Sondjonnyń týyndylary qoıylǵan. Sýretter adam, tabıǵat jáne tehnologııa arasyndaǵy ózara baılanysty kórsetedi. Avtor týyndylarynda tiri men jansyzdyń, kórinetin men kórinbeıtinniń arasyndaǵy shekarany zerttegen. Ekspozıtsııa mýltısensorlyq keńistik retinde usynylyp, beıne, dybys, qozǵalys pen vızýaldy obrazdardy biriktiredi. Sýretshi tabıǵat yrǵaqtaryn sezinýge múmkindik berip, kórermendi planetalyq ekojúıedegi baılanystar týraly oılanýǵa shaqyrady.

«Äiel Tizginde» kórmesinde ekspozıtsııalar zamanaýı qoǵamdaǵy áıel rólin kórkemdik turǵydan kórsetedi. Kórme zamanaýı óner tili arqyly áıel bolmysyna qatysty qalyptasqan kózqarastardy qaıta qarap, kóshbasshylyq, jaýapkershilik, tańdaý erkindigi jáne ishki turaqtylyq taqyryptaryn ashady. Ekspozıtsııa keskindeme, fotografııa, mýltımedııalyq jáne ınteraktıvti kórkem sheshimderdi biriktiredi.

Balalar álemi

Qýyrshaqtar teatrynda «Arystan patsha» qoıylymy ótedi. Onda uly Arystan patsha Mýfasynyń urpaǵy Sımba dúnıege keledi. Aǵasy Shram bılikti armandap, kishkentaı Sımbaǵa qorlyq kórsetedi. Sımba qıyndyqtardy bastan ótkerip, adal dostar taýyp, súıiktisimen kezdesedi. Qatal taǵdyr men synaqtardy jeńe otyryp, ol óz ornyn tabady jáne naǵyz patsha qandaı bolý kerektigin túsinedi. 

Opera jáne balet 

Astana opera teatrynda ótetin qoıylym keıipkeri ómirdiń tálkegine ushyraǵan Rıgoletto — biregeı aqylǵa ıe, alaıda saraıda qorlyqqa toly ról atqarady. Ol meıirimdi áke, biraq qyzy Djıldanyń tazalyǵy men qoǵamnyń moraldyq azǵyndyǵy arasyndaǵy qaıshylyqty kórsetedi. Djıldany qorlaǵan Gertsogqa kek alý áreketi Rıgolettony tragedııalyq taǵdyrǵa jeteleıdi. Mýzykalyq dramatýrgııada Mantýıa gertsogy men Rıgoletto qarama-qarsy beıneler retinde aıqyn kórinedi. Spektakl rejısseri Arno Bernar Gertsogty batyl, aqyldy, mádenıetti ári Qaıta órleý dáýiriniń rýhyna saı adam retinde kórsetedi. Gertsog qanaǵatsyz, shydamsyz, tapqyr jáne qyzyqqumar keıipker retinde sıpattalady. 

Mýzykalyq jas kórermen teatri «Shámshi» mıýzıkli áıgili qazaq kompozıtorynyń ómiri men shyǵarmashylyǵyn kórsetedi. Kompozıtordyń ómirdegi qıyndyqtarmen kúresi, adam men qoǵamǵa degen fılosofııasy jáne ishki sezimderin ánge aınaldyrýy spektakldiń basty qundylyǵyn quraıdy. Árbir Shámshi áni avtordyń oıy men ómirindegi oqıǵalardy beıneleıdi. Bul ánder kórermenniń júregine áser etip, meıirim, mahabbat jáne adamgershilik qasıetterin oıatady.

Qalıbek Qýanyshbaev atyndaǵy Qazaq ulttyq mýzykalyq drama teatry Sholpannyń kúnási atty qoıylymnyń premerasy ótedi. Er men áıel — ekeýi eki keńistik. Eki ǵalam. Keıde taǵdyr jeli sol eki ǵalamdy túıistirip, bir-birine jaqyndatady. Biraq túıisý — tolyq bir bolý emes. Ár adam — jalǵyz. Sol jalǵyzdyǵy — onyń ózine ǵana tán ǵaryshy, qupııaǵa toly ishki álemi. Biriniń jaryǵy — kúńgirt, biriniń shyraǵy — alaý. Biraq árkimniń aspany óziniki. Adam balasy úshin shyn máni bar dúnıe ózinen qalǵan izi, ishtegi jaryqtyń ózge júrekte jalǵasýynda…

Ázirbaıjan Mámbetov atyndaǵy memlekettik drama jáne komedııa teatrynda Muqaǵalı Maqataevty eske alý keshi ótedi.

«Jastar» teatry «Ǵashyqtar» qoıylymy kórsetiledi.  

Drama kirshiksiz mahabbatty ardaqtaý men odan da joǵary turatyn uly kúsh — ar tazalyǵy týraly syr shertedi. Kórermendi oı ormanyna alyp baryp, onda mahabbat pen ǵashyqtyqtyń basqa salar aýyr taǵdyryn sýretteıdi. Ǵashyqtyq ǵalamatyna dýshar bolǵan adamnyń jan kúızelisi men tán kúızelisin qatar sıpattaıdy.

Qalıbek Qýanyshbaev atyndaǵy Qazaq ulttyq mýzykalyq drama teatrynda Baıan Sulý– Qozy Kórpesh qoıylymy kórsetiledi. 

Sondaı-aq Mýzykalyq jas kórermen teatrynda Qoshtasqym kelmeıdi qoıylymynyń premerasy ótedi. 

Kórnekti dramatýrg A. M. Volodınniń klassıkalyq týyndysy erli-zaıyptylardyń ómiri men kúrdeli qarym-qatynasyn baıandaıdy. Pesa áleýmettik mártebe men kózqarasy ártúrli segiz otbasy týraly. Olar ajyrasýǵa bel býyp, sotqa júginedi. Al sot tóraǵasy nekelerin buzbaý úshin baryn salady. Óıtkeni erli-zaıyptylardyń menmendigi men ózimshildigi birin-biri túsinýge kedergi bolǵan. Pesa keıipkerler arasyndaǵy qaqtyǵystar arqyly ár túrli minez-qulyq erekshelikterin kórsetedi. Ár adam jeke álemimen birge, Otbasy degen uly qundylyqqa qosatyn mahabbat pen yntymaqty pash etedi.

Sondaı-aq elordada Shómishbaı Sarıev — 80 jyl: «Atameken-aı» kontserti ótedi. 

Shómishbaı Sarıevtiń jyrlary halyqtyń rýhanı álemine keńinen taraldy. Onyń shyǵarmalary án retinde oryndalyp, kópshiliktiń súıispenshiligine bólengen. Kontsertte avtordyń klassıkaǵa aınalǵan tańdaýly týyndylary — «Aınaldym senen, atameken-aı», «Dombyra týraly ballada», «Saǵyndym saǵym jyldar», «Aıaýlym», «Sen muńyńdy ber maǵan», «Erkelediń sen», «Ókinbe sen» jáne basqa da shyǵarmalary tyńdaýshyǵa usynylady.

Al aptanyń kıno premeralary jaıly Kazinform agenttiginiń senbi kúni jarııalanatyn turaqty aıdarynan oqı alasyz.