Senattyń jýrnalısterge arnalǵan baıqaý erejesi ózgerdi
NUR-SULTAN. QazAqparat - Senat Tóraǵasy Darıǵa Nazarbaevanyń tapsyrmasy boıynsha jýrnalısterge arnalǵan «Amanat» baıqaýynyń erejesine ózgerister engizildi, dep habarlaıdy QazAqparat.
«Baıqaýdy ótkizý tártibine mańyzyna baılanysty taǵy bir baǵyt qosyldy – buqaralyq aqparat quraldary ókilderi koronavırýs indetimen kúresip jatqan jáne onyń zalaldaryn joıýǵa belsendi qatysatyn mamandardyń qyzmetin jarııa etetin bolady. Tótenshe jaǵdaı kezindegi elimizdegi aýqymdy sharalarǵa belsene atsalysyp jatqan medıtsına, ishki ister organdary, arnaýly memlekettik organdar, áskerıler, eriktiler, azamattar men basqa da uıym mamandarynyń biliktiligi, batyldyǵy men batyrlyǵy dáriptelgen materıaldar erekshe baǵalanady», - delingen Parlament Senaty baspasóz qyzmetiniń habarlamasynda.
Aıta keteıik, QR Senaty buqaralyq aqparat quraldarynyń ókilderi jáne blogerler arasynda Senat materıaldary boıynsha úzdik zertteýge arnalǵan «Amanat» jáne ekologııalyq jýrnalıstıkaǵa arnalǵan «Týǵan el» baıqaýyn jarııalaǵan bolatyn.
«Amanat» baıqaýy Senat qyzmeti týraly Qazaqstan jurtshylyǵynyń habardar bolýyn arttyrýǵa arnalǵan. Baıqaýǵa túsetin jumystarda Senat depýtattarynyń zańdarǵa engizgen túzetýleriniń mańyzy men ereksheligine jáne olardyń problemalardy sheshýge, sondaı-aq depýtattardyń aımaqtar máselelerin qarastyrýǵa qatysty ózekti materıaldar eskeriledi.
«Týǵan el» baıqaýynyń qatysýshylary óz materıaldarynda qorshaǵan ortany qorǵaý máselelerine qalyń jurtshylyqtyń nazaryn aýdarýy, azamattardyń ekologııalyq qolaıly jáne qaýipsiz ortada turý quqyǵyn qorǵaýǵa, sondaı-aq ekologııalyq problemalardy jarııa etýge, tiri tabıǵattyń bıoalýantúrliligin saqtaýǵa jýrnalısterdi tartýy tıis.
Baıqaýǵa jýrnalıster, respýblıkalyq jáne aımaqtyq telearnalar men gazetterdiń, ınternet basylymdar men radıolardyń qyzmetkerleri, blogerler qatysa alady.
Baıqaýǵa 1 qyrkúıek pen 5 mamyr aralyǵynda buqaralyq aqparat quraldarynda jarııalanǵan avtorlyq ujymdardyń, jeke avtorlardyń materıaldary qatysatyn bolady. Baıqaý ótken jyldyń 1 qarashasynan bastaldy. Materıaldar bıyldyń 12 mamyryna deıin qabyldanady, 20 maýsymda qorytyndylaý josparlanyp otyr.
Baıqaý jeńimpazdary baǵaly syılyqtarǵa ıe bolady. Baıqaýǵa qatysty tolyq aqparatty Parlament Senatynyń saıtynan, sonymen qatar áleýmettik jelilerdegi resmı akkaýnttardan bilýge bolady.
