Senattyń jańarýy eldiń búkil azamattarynyń múddesin qorǵaýǵa baǵyttalǵan - sarapshy

ASTANA. QazAqparat – Búgin Parlamenttiń joǵary palatasynyń spıkeri men vıtse-spıkeri saılanyp, depýtattyq quramdy jańartý aıaqtaldy. Osyǵan oraı QR Prezıdenti janyndaǵy Qazaqstannyń strategııalyq zertteýler ınstıtýtynyń aǵa ǵylymı qyzmetkeri Gúlmıra Toqanova pikir bildirip, onyń elimiz úshin mańyzyn túsindirdi, dep habarlaıdy QazAqparat tilshisi.

Sarapshynyń atap ótýinshe, qańtar aıynyń ortasynda 40 senatordyń jartysy ádettegideı 3 jylda bir ret óńirlik máslıhat depýtattarynyń tarapynan saılandy.

Onyń qatarynda jańadan qurylǵan Abaı, Ulytaý jáne Jetisý oblystarynyń da ókilderi bar. Osylaısha Senat el bıliginiń zańnamalyq tarmaǵyndaǵy óńirlik ókildikti tolyǵymen qamtydy.

Sonymen qatar, Prezıdent Jarlyǵymen 10 senator taǵaıyndalsa, onyń beseýi arnaýly kvota arqyly keldi. ıAǵnı, Qazaqstan halqy Assambleıasynan 5 senator taǵaıyndaldy.

«Jalpy, eldiń joǵary zańnamalyq organyndaǵy túrli áleýmettik toptardyń ókildik etý múddesin júzege asyrý tetikteri ótken jyldyń maýsymynda bolǵan referendýmdaǵy konstıtýtsııalyq ózgeristerdiń arqasynda bolyp otyr. Soǵan oraı Senattyń depýtattyq quramyn jańartýdyń túrli tetikteri eldiń barlyq azamattarynyń ókildik etýin jáne múddeleriniń qorǵalýyn qamtamasyz etýge baǵyttalǵan», - dedi ol.

Onyń paıymynsha, Senat quramyn jasaqtaýdy aıaqtaý eldiń saıası oqıǵalar tizbegindegi mańyzdy oqıǵalardy túıindeıdi.

Bul ásirese, Májilistiń aldaǵy saılaýy turǵysynda óte mańyzdy. Májilis qyzmetin doǵarǵan aralyqta barlyq zańnamalyq qyzmet Senatqa júkteledi.

Al bul úlken ózgerister jaǵdaıynda da bıliktiń osy tarmaǵy jumysynyń turaqtylyǵyn qamtamasyz etedi.

«Jarııa bılik organy retinde Senat tabysty ınstıtýtsııalandyrý belgilerin pash etti», - deıdi Gúlmıra Toqanova.

Foto: kisi.kz