Senattyń jalpy otyrysynda Eń tómengi jalaqyny belgileý týraly konventsııa qaralady
Atap aıtqanda, palata depýtattary Qazaqstan men Vetnam arasyndaǵy azamattyq ister boıynsha ózara quqyqtyq kómek týraly kelisimdi talqylaıtyn bolady. Budan bólek, Eń tómengi jalaqyny belgileý rásimin jasaý týraly konventsııany (26-konventsııa) jáne Jalaqyny qorǵaý týraly konventsııany (95-konventsııa) ratıfıkatsııalaý týraly zań jobalary usynylyp otyr. Sonymen qatar, «Azamattyq qorǵaý týraly» jáne azamattyq qorǵaý máseleleri boıynsha ilespe zań jobalary birinshi oqylymda, zańnamaǵa ishki ister organdarynyń qyzmeti máseleleri boıynsha ózgerister men tolyqtyrýlar engizý týraly zań jobasy ekinshi oqylymda qaraý josparlanady. Bıýroda Májiliste maquldanǵan zań jobalaryna Senattyń bas komıtetteri belgilendi. Odan basqa, Bıýroda Qazaqstan Respýblıkasy Parlamenti Senatynyń Qurmet gramotasymen marapattaý máselesi de qaraldy.