Senattyń jalpy otyrysynda 12 másele qaralady
ASTANA. 17 qańtar. QazAqparat /Qanat Mámetqazyuly/ - Erteń, 18 qańtarda QR Parlamenti Senatynyń kezekti otyrysy bolady.
Bul týraly Senattyń baspasóz qyzmetinen habarlandy.
Jalpy otyrysta Senat Bıýrosy 12 máseleni kúntártibine shyǵaryp otyr. Atap aıtqanda, senatorlar «Islam Konferentsııasy Uıymynyń Jarǵysyn ratıfıkatsııalaý týraly» zań jobasy, «Qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq top týraly kelisimdi ratıfıkatsııalaý týraly», «Qazaqstan Respýblıkasynyń Joǵary Sot Keńesi týraly» Qazaqstan Respýblıkasynyń Zańyna ózgerister men tolyqtyrýlar engizý jáne Qazaqstan Respýblıkasynyń keıbir zańnamalyq aktileriniń kúshin joıyldy dep taný týraly» zań jobalaryn talqylaıtyn bolady. Budan bólek, sot júıesi men sýdıalarynyń mártebesi týraly zańǵa ózgerister engizetin qujat ta talqyǵa túsedi. Sonymen qatar, «Qazaqstan Respýblıkasynyń keıbir zańnamalyq aktilerine probatsııa qyzmeti máseleleri boıynsha ózgerister men tolyqtyrýlar engizý týraly», «Áskerı qyzmet jáne áskerı qyzmetshilerdiń mártebesi týraly» jobalar birinshi oqylymda qaralady. Eńbek kodeksine engizilgen ózgerister men tolyqtyrýlar ekinshi oqylymda talqyǵa salynbaq.
