Senattyń vıtse-spıkeri A. Beısenbaev Atyraý oblysynyń ardagerlerimen kezdesti

ASTANA. 5 qarasha. QazAqparat - Búgin QR Parlamenti Senaty Tóraǵasynyń orynbasary Asqar Beısenbaev Astanaǵa kelgen Atyraý oblysynyń ardagerlerimen kezdesti. Kezdesýde uzaq jyldar munaıly ólkeniń ekonomıkasyn damytý men halyqtyń áleýmettik jaǵdaıyn jaqsartýǵa aıanbaı atsalysqan, sondaı-aq ár kezeńde basshylyq laýazymdarda qyzmet atqarǵan eńbek ardagerleri búgingi elimiz qol jetkizip otyrǵan jetistikterge rızashylyǵyn bildirip, el damýyndaǵy Elbasynyń kóshbasshylyq rólin erekshe atap ótti. Bul týraly Senattyń baspasóz qyzmetinen habarlandy.

Senat tóraǵasynyń orynbasary júzdesýde «Qazaqstan-2050» Strategııasynda» Memleket basshysy alǵa qoıǵan mindetterdi júzege asyrýda Parlamentte atqarylyp jatqan jumystar týraly jan-jaqty áńgimeledi. Sondaı-aq basqosýda áleýmettik-ekonomıkalyq jańǵyrtý jáne ındýstrııalyq-ınnovatsııalyq damý baǵdarlamasyn zańnamalyq turǵyda qamtamasyz etýdegi depýtattyq korpýstyń qyzmeti týraly aıtyldy. «Parlament bizdiń ardagerler men aǵa urpaq ókilderin áleýmettik qorǵaýdy kúsheıtetin zańnamalardy jetildirýde ulan-ǵaıyr jumystar júrgizip keledi», - dedi Tóraǵa orynbasary.

Sonymen birge A.Beısenbaev kezdesýge kelgen aqsaqaldar arasyndaǵy 94 jastaǵy soǵys ardagerine uzaq ǵumyr tiledi jáne «Úlkenge - qurmet, kishige izet kórsetý bizdiń elimizdegi qasterli dástúrlerdiń biri. Osy Jeńiske jetkizgen Uly Otan soǵysynyń ardagerlerine sheksiz alǵys aıtamyz. Bizdiń ardagerlerdiń janqııarlyq erligi men eńbeginiń arqasynda beıbit ómir keship jatyrmyz. Táýelsizdik alǵan jyldardan beri memleket tarapynan ardagerlerdiń áleýmettik jáne turmystyq jaǵdaıyn jaqsartý úshin barlyq múmkindikter jasalyp keledi. Bul mańyzdy is budan bylaı da jalǵasa beretin bolady», - dep atap ótti.