Senattyń turaqty komıtetiniń tóraǵalary qaıta saılandy
ASTANA. QazAqparat - Búgin QR Parlamenti Senatynyń jalpy otyrysy jańa qurammen ótip, onyń barysynda palata komıtetteriniń tóraǵalary qaıta saılanǵan bolatyn. Eske sala keteıik, jaqynda Ortalyq saılaý komıssııasy 2014 jyldyń 1 qazanyndaǵy saılaýda saılanǵan QR Parlamenti Senatynyń 16 depýtatyn resmı tirkeýden ótkizip, olar jańadan jumysqa kiristi.
Kún tártibindegi máselelerdi qaraý barysynda jańa quramdaǵy Senat depýtattary palatanyń komıtetter ataýy men sanyn ózgertpeı qaldyrýdy jaqtady. Osyǵan oraı, komıtetter tóraǵalaryna kandıdattar usynylyp, olar ashyq daýys berý arqyly saılandy. Atap aıtqanda, Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy bolyp Serik Aqylbaı, Qarjy jáne bıýdjet komıtetine - Rashıt Ahmetov, Halyqaralyq qatynastar, qorǵanys jáne qaýipsizdik komıtetine - Ikram Adyrbekov, Ekonomıkalyq saıasat, ınnovatsııalyq damý jáne kásipkerlik komıtetiniń tóraǵalyǵyna Talǵatbek Abaıdildın saılandy.
Al Áleýmettik-mádenı damý jáne ǵylym komıtetiniń tóraǵalyǵyna Aqan Bıjanov, Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy bolyp Sergeı Plotnıkov saılandy.
Jıyn barysynda palata spıkeri Q. Toqaev komıtet tóraǵalaryn quttyqtap, jumystaryna jemis tiledi.
