Senattyń kezekti otyrysynyń kún tártibi naqtylandy
Palata otyrysynda qaraý úshin «Respýblıkalyq bıýdjettiń atqarylýyn baqylaý jónindegi esep komıtetiniń múshesi qyzmetine taǵaıyndaý týraly» QR Parlamenti Senaty Tóraǵasynyń usynýy kún tártibine shyǵaryldy.
Sonymen qatar senatorlar aldaǵy beısenbide jańa zańnamalyq bastamalar toptamasyn talqylaıdy.
Naqty aıtqanda, endi salyqtar men tólemderdiń 4 túri aýdandyq deńgeıden aýyldyq okrýg bıýdjeti deńgeıine beriledi. Olar: biryńǵaı jer salyǵy, jer ýchaskelerin paıdalanǵany úshin tólem, jer ýchaskelerin satýdan túsetin túsimder jáne jer ýchaskelerin jaldaý quqyǵyn satqany úshin tólem. Jergilikti máslıhattar men olardyń depýtattarynyń qyzmetine qatysty da ózgerister bar. Mundaı jańashyldyqtar «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» zań jobasynda jazylǵan.
Sondaı-aq, palata otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy qaralady. Bul qujatta ákimshilik quqyq buzýshylyq týraly keıbir isterdi qaraý úshin ýchaskelik ınspektorlardyń ókilettikterin keńeıtý usynylǵan. Odan bólek, zań jobasynda jumys berýshilerdiń qyzmetkerge qatysty qujat eńbekaqy tóleý, jumys ýaqyty men demalys rejımi boıynsha kemsitýshilikke jol bermeý jónindegi jaýapkershiligi qarastyrylǵan.
Buǵan qosa, senatorlar aldaǵy otyrysta depýtattardyń bastamashy bolýymen ázirlengen eki zań jobasyn qaraıdy. Olardyń biri - «Qazaqstan Respýblıkasynyń keıbir zańnamalyq aktilerine reıderlikke qarsy kúresti kúsheıtý, kásipkerlik qyzmetti memlekettik organdar men laýazymdy adamdardyń zańsyz aralasýynan qorǵaý jáne baǵaly metaldardyń zańsyz aınalymyna kedergi keltiretin sharalardy kúsheıtý máseleleri boıynsha ózgerister men tolyqtyrýlar engizý týraly» zań jobasy. Qujat kásipkerlerdiń qyzmetine zańsyz aralasýdan qorǵaýǵa kepildikterdi kúsheıtýge múmkindik beredi.
Depýtattar bastamashy bolǵan ekinshi zań jobasynda qashyqtan jumys isteýdi engizý, jalaqy mólsherin, qyzmetkerdiń ýaqytsha qashyqtan jumys isteýge aýysatyn merzimin, jumys ýaqytynyń rejımin belgileý, aqparattyq qaýipsizdikti qamtamasyz etý máselelerinde jumys berýshi men qyzmetkerdiń jaýapkershiligin aıqyndaý máseleleri qarastyrylǵan. Mundaı normalar «Qazaqstan Respýblıkasynyń Eńbek kodeksine qashyqtan jumys isteýdiń quqyqtyq rettelýin jetildirý máseleleri boıynsha ózgerister men tolyqtyrýlar engizý týraly» zań jobasynda jazylǵan.
Sonymen birge palata otyrysynda senatorlar «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zań jobasyn da qaraıdy. Atalǵan qujat Memleket basshysynyń tapsyrmalaryn oryndaý maqsatymen Jer reformasy jónindegi komıssııa jumysynyń qorytyndysy boıynsha ázirlendi. Bul zań jobasy jer zańnamasyn jetildirýge, aýyl sharýashylyǵy maqsatyndaǵy jerlerdi jaldaý ınstıtýtyn retteýge jáne jerdi paıdalanýǵa memlekettik baqylaýdy kúsheıtýge arnalǵan.
Sondaı-aq, Bıýro otyrysynda Májilisten kelip túsken zań jobalary Senat komıtetterine bólinip berildi.