Senattyń kezekti otyrysynyń kún tártibi aıqyndaldy
ASTANA. 20 mamyr. QazAqparat - Búgin QR Parlamenti Senatynyń tóraǵasy Qaırat Mámıdiń jetekshilik etýimen palatanyń Bıýro otyrysy boldy.
Bıýroda Parlament Májilisinde maquldanǵan zań jobalary Senattyń turaqty komıtetteri men Apparatqa berildi. Bul týraly Senattyń baspasóz qyzmetinen habarlandy.
Bıýro bekitken qaýlyǵa sáıkes, Tabıǵatty paıdalaný jáne aýyldyq aýmaqtardy damytý komıteti Qazaqstan Respýblıkasynyń keıbir zańnamalyq aktilerine jergilikti ózin-ózi basqarýdy damytý máseleleri boıynsha ózgerister men tolyqtyrýlar engizý týraly zań jobasy boıynsha bas komıtet bolyp belgilendi.
Al Ekonomıkalyq damý jáne kásipkerlik komıteti elimizdiń keıbir zańnamalyq aktilerine memlekettik basqarý organdary arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly zań jobasy boıynsha bas komıtet bolyp belgilendi.
Sonymen qatar, Bıýroda bıylǵy 23 mamyrda bolatyn Senattyń kezekti jalpy otyrysynyń kún tártibi de talqylandy. Otyrysta Qazaqstan Respýblıkasynyń Úkimeti men Ulybrıtanııa jáne Soltústik Irlandııa Qurama Koroldiginiń Úkimeti arasyndaǵy Qazaqstan aýmaǵy arqyly áskerı múlik pen personaldyń tranzıtin qamtamasyz etý týraly, sondaı-aq Keden odaǵynyń kedendik shekarasy arqyly ótkiziletin taýarlardyń kedendik qunyn aıqyndaý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly zań jobalaryn qaraý josparlandy.
Senattyń jalpy otyrysynda sondaı-aq elimizdiń keıbir zańnamalyq aktilerine Keden odaǵynda tarıftik emes retteý sharalaryn qoldaný (birinshi oqylym), ekonomıkalyq qyzmet salasyndaǵy qylmystardy odan ári qylmystyq sıpattan aryltý (ekinshi oqylym), zeınetaqymen qamsyzdandyrý (ekinshi oqylym) máseleleri boıynsha ózgerister men tolyqtyrýlar engizý týraly jáne Qazaqstan Respýblıkasyndaǵy zeınetaqymen qamsyzdandyrý týraly (ekinshi oqylym) zań jobalaryn da qaraıtyn bolady.
Sonymen qatar elimizdiń keıbir zańnamalyq aktilerine tóreliktiń jáne aralyq sottyń qyzmetin jetildirý máseleleri boıynsha ózgerister men tolyqtyrýlar engizý týraly zań jobasy boıynsha Parlament Májilisi men Senat arasyndaǵy kelispeýshilikterdi qaraý jáne eńserý úshin kelisý komıssııasynyń quramyna Senat depýtattaryn saılaý týraly másele de qaralady.
