Senattyń kezekti otyrysy 23 maýsymda bolady
ASTANA. QazAqparat - Parlament Senatynyń Bıýrosy Palatanyń 23 maýsymda bolatyn otyrysynyń kún tártibin kelisti.
Senatorlar Táýelsiz Memleketter Dostastyǵyna múshe memleketterdiń aýmaqtarynda birlesken jedel-tergeý toptaryn qurý tártibi jáne olardyń qyzmeti týraly kelisimdi; Eýrazııalyq ekonomıkalyq odaq sheńberinde dárilik zattar aınalysynyń biryńǵaı qaǵıdattary men qaǵıdalary týraly kelisimge Armenııa Respýblıkasynyń qosylýy týraly hattamany; Eýrazııalyq ekonomıkalyq odaq sheńberinde medıtsınalyq buıymdar aınalysynyń biryńǵaı qaǵıdattary men qaǵıdalary týraly kelisimge Armenııa Respýblıkasynyń qosylýy týraly hattamany ratıfıkatsııalaý týraly zań jobalaryn qaraıdy. Depýtattar «Qazaqstan Respýblıkasy Jer kodeksiniń jekelegen normalarynyń qoldanysyn jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» 2015 jylǵy 2 qarashadaǵy Qazaqstan Respýblıkasy Zańynyń qoldanysqa engizilýin toqtata turý týraly» zań jobasyn da qaraıtyn boldy.
Bıýro Qaýlysymen Senat otyrysynyń kún tártibine Respýblıkalyq bıýdjettiń atqarylýyn baqylaý jónindegi esep komıtetiniń múshesi qyzmetine taǵaıyndaý týraly másele de engizildi.
Bıýroda Májilisten túsken zań jobalary bólinip berildi.
Agrarlyq máseleler, tabıǵatty paıdalaný jáne aýyldyq aýmaqtardy damytý komıteti «Qazaqstan Respýblıkasy Jer kodeksiniń jekelegen normalarynyń qoldanysyn jáne «Qazaqstan Respýblıkasynyń Jer kodeksine ózgerister men tolyqtyrýlar engizý týraly» 2015 jylǵy 2 qarashadaǵy Qazaqstan Respýblıkasy Zańynyń qoldanysqa engizilýin toqtata turý týraly» zań jobasy boıynsha bas komıtet bolyp belgilendi.
Halyqaralyq qatynastar, qorǵanys jáne qaýipsizdik komıteti Qazaqstan men Reseı Federatsııasy arasyndaǵy Jer qoınaýyn paıdalanýǵa arnalǵan egemendik quqyqtardy júzege asyrý maqsatynda Kaspıı teńizi soltústik bóliginiń túbin mejeleý týraly kelisimge ózgeris engizý týraly Hattamany ratıfıkatsııalaý týraly zań jobasyn pysyqtaýǵa jáne qorytyndy ázirleýge jaýapty bolyp belgilendi.
