Senattyń qaraýyna menshik quqyǵyn qorǵaýdy kúsheıtýge baǵyttalǵan zań jobasy shyǵarylady
ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysy ótip, onda «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, sharttyq mindettemelerdi qorǵaýdy kepildendirý jáne olardy buzǵany úshin jaýapkershilikti qatańdatý máseleleri boıynsha ózgerister men tolyqtyrýlar engizý týraly» zań jobasy talqylandy.
Atalǵan qujat boıynsha memlekettik organdardyń nemese laýazymdy adamdardyń zańsyz aktiler shyǵarýy nátıjesinde menshik ıeleriniń quqyqtaryn buzǵany úshin jaýapkershilikti naqtylaý usynylady. Bul rette menshik ıelerine keltirilgen shyǵyndar memlekettik organnyń nemese laýazymdy adamnyń kináli, kinásizdigine qaramastan óteletin bolady ári bul sot sheshimi arqyly júzege asady. Budan bólek, zań jobasynda kepilzatpen qamtamasyz etilgen mindettemelerdi merziminen buryn oryndaý jáne kepilge salynǵan múlikke óndirip alýdy qoldaný týraly normalardy ekiudaı túsinýdi bolǵyzbaý qarastyrylady. Sonymen birge, zań jobasymen naqty jyljymaıtyn múlik nysany boıynsha aqparatty quqyq ıelenýshiniń kelisimimen ózge de tulǵalardyń suraý salýyna oraı berýge bolatyn tulǵalardyń túbegeıli toby aıqyndalady. Jalpy alǵanda zań jobasynda usynylyp otyrǵan erejeler menshik ıesiniń quqyǵyn jáne sharttyq mindettemelerdi qorǵaý ınstıtýtyn odan ári nyǵaıtýǵa yqpal etetin bolady. «Birinshiden, Azamattyq kodekste menshik quqyǵyn buzǵany úshin sondaı zańsyz aktiler shyǵarǵan memlekettik organnyń nemese jaýapty tulǵanyń jaýapkershiligi týraly norma naqtylanady. Ekinshiden, kepilmen qamtamasyz etilgen, sonyń ishinde ıpotekalyq boryshtarmen kepilge qoıǵan múlikti aınalymǵa alýdyń mindettemelerin jedel oryndaý týraly normanyń ekijaqty túsiginin boldyrmaý qarastyrylady», -dedi QR Ulttaq banki tóraǵasynyń orynbasary Qýat Qojahmetov. Onyń aıtýynsha, «Valıýt-Tranzıt Bank» AQ salym jasaǵan jeke tulǵalardyń bes mıllıon teńgege deıingi qarajattaryna kepildik týraly normany qamtamasyz etý maqsatynda zańnamaǵa da ózgerister engiziledi. Budan bólek, zań jobasynyń taǵy bir jańalyǵy - onda banktiń qaryz týraly kelisimsharttarynda klıentke usynylatyn somanyń, sonyń ishinde bankke qaıtarylatyn paıyz ben jalpy syıaqy somasynyń qysqasha málimeti kórsetilgen jadynamalardyń bolýy týraly norma da qamtylyp otyr. Qujatty talqylaǵan soń, komıtet depýtattary zań jobasyn Senattyń jalpy otyrysyna shyǵarý týraly sheshimge keldi.
