Senattyń aldaǵy otyrysynyń kún tártibi bekitildi
ASTANA. 27 mamyr. QazAqparat - Búgin Senat spıkeri Qaırat Mámıdiń tóraǵalyq etýimen Qazaqstan Respýblıkasy Parlamenti Senaty Bıýrosynyń otyrysy boldy. Bul týraly palatanyń baspasóz qyzmetinen habarlandy.
Bıýroda Parlament Májilisi maquldaǵan Qazaqstan men Belarýstiń dıplomatııalyq ókildikterdi ornalastyrý úshin jer ýchaskelerin ózara berý týraly úkimetaralyq kelisimdi ratıfıkatsııalaý týraly zań jobasy Senattyń turaqty komıtetteri men Apparatqa berildi. Zań jobasy boıynsha Halyqaralyq qatynastar, qorǵanys jáne qaýipsizdik komıteti bas komıtet bolyp belgilendi.
Budan bólek, Bıýro aldaǵy 30 mamyrda bolatyn Senattyń kezekti otyrysynyń kún tártibin talqylady. Otyrysta Qazaqstan men Belarýstiń dıplomatııalyq ókildikterdi ornalastyrý úshin jer ýchaskelerin ózara berý týraly úkimetaralyq kelisimdi ratıfıkatsııalaý týraly zań jobasyn qaraý josparlandy.
Odan basqa, Qazaqstan Respýblıkasynyń Konstıtýtsııalyq zańyna jáne elimizdiń keıbir zańnamalyq aktilerine ártúrli zańnamalyq aktilerdiń quqyq normalary arasyndaǵy qaıshylyqtardy, olqylyqtardy, kollızııalardy jáne sybaılas jemqorlyq quqyq buzýshylyqtar jasaýǵa yqpal etetin normalardy joıý máseleleri boıynsha ózgerister men tolyqtyrýlar engizý týraly Konstıtýtsııalyq zań jobasy birinshi oqylymda qaralady. Sondaı-aq sot-saraptama qyzmeti, jergilikti ózin-ózi basqarý, memlekettik basqarý organdary arasyndaǵy ókilettikterdiń arajigin ajyratý máselelerin qamtyǵan zań jobalaryn birinshi oqylymda qaraý josparlandy. Senatorlar Keden odaǵynda tarıftik emes retteý sharalaryn qoldaný máseleleri boıynsha ózgerister men tolyqtyrýlar engizý týraly zań jobasyn ekinshi oqylymda qaraıtyn bolady.
