Senattyń 4 depýtaty qaıta saılaýǵa túskeli otyr - OSK
ASTANA. QazAqparat - Parlament Senatynyń qazirgi 4 depýtaty qazannyń 1-ine belgilengen saılaýǵa túskeli otyr. Bul týraly Ortalyq saılaý komıssııasynyń múshesi Lázzat Súleımen málim etti.
Eske sala keteıik, qazan aıynda ótetin saılaýǵa usynylǵan 88 úmitkerdiń 53-i tirkeýden ótken bolatyn.
«Tirkelgenderdiń mamandyǵy boıynsha 21-i ınjener, 9-y aýyl sharýashylyǵy qyzmetkerleri (agronom, zootehnık, mal dárigerleri jáne basqalar), 8-i ekonomıst, 8-i dáriger, 4-eýi oqytýshy jáne bireýi - zańger. Qyzmet túrlerine kelsek, olardyń tórteýi Parlament Senatynyń depýtaty, 22-si memlekettik organdardyń, uıymdardyń, kásiporyndardyń jáne mekemelerdiń qyzmetkerleri. 16-sy kommertsııalyq qurylym qyzmetkerleri, 9-y ǵylym, mádenıet, bilim berý, densaýlyq saqtaý mekemeleriniń qyzmetkerleri», - deıdi L. Súleımen.
Onyń sózine qaraǵanda, saılaý naýqany saılaý zańnamsyna sáıkes ótip jatyr. Al osy kezeń ishinde Ortalyq saılaý komıssııasyna 2 ótinish kelip túsken. Olardyń bireýi Senat depýtattyǵyna kandıdattardy usyný jáne tirkeý tártibin retteıtin saılaý zańnamasynyń normalaryn túsindirýdi talap etedi. Ekinshi ótinishte Senat depýtattyǵyna tirkelgen kandıdattardyń biriniń saılaý naýqanyna qatysy joq is-áreketterine shaǵym qamtylǵan. «Eki ótinish te qaraldy. Ótinish ıelerine ýaqtyly jaýap berildi», - deıdi L. Súleımen.
