Senattyń sońǵy otyrysy ótti: depýtattar endi qandaı jumysqa aýysady
ASTANA. KAZINFORM — Senattyń sońǵy otyrysynan keıingi brıfıngte Máýlen Áshimbaev depýtattar endi qandaı qyzmetke baratyny jóninde málimdeme jasady.
— Ómir boıy depýtat bolý kerek degen shart joq. Memlekettik qyzmet degen — ýaqytsha dúnıe. Memlekettik qyzmetke kelý bar, memlekettik qyzmetten durystap ketý bar. Keıde kelýden góri ketý mańyzdyraq. Áriptesterimizdiń bári — tájirıbeli azamattar. Ortalyqta da, óńirlerde de, memlekettik qyzmette de, basqa salalarda da olar ary qaraı ózderiniń áleýetin júzege asyryp, memlekettiń damýyna úles qosa beretinine tolyqtaı senemin, — dedi ol.
Sonymen qatar, Máýlen Áshimbaev Senat apparatynyń qyzmetkerleri áleýmettik turǵydan qorǵalǵanyn atap ótti.
— Bizdiń apparatymyz óte kúshti. Májilistiń de apparaty óte kúshti. Konstıtýtsııalyq ózgeristerge baılanysty eshkimdi jumystan shyǵarǵan joqpyz. Apparatymyzdyń qyzmetkerleri Quryltaıǵa jumysqa aýysady. Keı bóligi Halyq keńesine ornalastyrylady. Biz mamandardy joǵaltyp jatqan joqpyz. Bul — bizdiń ustanymymyz. Bul turǵydan, olar áleýmettik jaǵynan qorǵalǵan, — dedi Máýlen Áshimbaev.
Aıta keteıik, buǵan deıin Áshimbaev Senattyń jumysyn qorytyndylaǵanyn jazǵanbyz.
