Senattyń qoldaýymen shahmattan Senat Open respýblıkalyq týrnıri ótedi

Máýlen Áshimbaev Qazaqstan shahmat federatsııasynyń vıtse-prezıdenti Aleksandr Babenkomen kezdesip, elimizde shahmatty damytý jáne halyqaralyq saıys ótkizý máselelerin talqylady.

Kezdesý barysynda federatsııa ókili Qazaqstanda shahmatty damytýdyń 2023-2027 jyldarǵa arnalǵan keshendi josparyn iske asyrý baǵytyndaǵy jumystar jóninde aıtty. Astanada álem chempıony ataǵy sarapqa salynǵan jarys pen Azııa chempıonatynyń ótkizilýi sonyń bir nátıjesi ekenin atap ótken jón. Qurlyqtyq saıysta 18 elden kelgen 126 shahmatshy baq synady.

Suhbat kezinde jattyqtyrýshylardyń biliktiligin arttyrý ulttyq qurama sportshylaryn daıarlaý úshin kásibı mamandardy jumyldyrý, oqytý formattaryn jetildirý, shahmat klýbtaryn ashý sııaqty birqatar ózekti máseleler de áńgimege arqaý boldy.

Sondaı-aq Aleksandr Babenko elimizde shahmatty dáripteý isine qoldaý kórsetkeni úshin Máýlen Áshimbaevqa alǵys bildirdi.

Óz sózinde Máýlen Áshimbaev Qazaqstanda shahmattyń damýyna úlken úles qosatyn jáne qatysýshylardyń sheberlikterin shyńdaýǵa yqpal etetin halyqaralyq týrnır ótkizýdiń mańyzdy ekenin atap ótti. Sonymen qatar ol Senat tarapynan elimizde shahmat qozǵalysyn odan ári damytýǵa jáne Qazaqstan shahmat federatsııasynyń qyzmetin jetildirýge qoldaý kórsetile beretinin tilge tıek etti.

Kezdesýde aldaǵy ýaqytta Senattyń qoldaýymen shahmattan qoǵam belsendileri, jýrnalıster, sondaı-aq, Parlament jáne máslıhat depýtattary arasynda ótkiziletin «Senat Open» týrnırine qatysty máseleler de talqylandy.

Aıta keteıik, qazirgi tańda elimizde 200 myńnan astam adam shahmatpen aınalysady. Jeti óńirde atalǵan oıyndy úıretý úshin pılottyq joba qolǵa alynǵan. Bul bastama 42 mektep pen 1000 oqýshyny qamtyp otyr.