«Senattyń birde-bir otyrysynan qalmaǵan» - Kazinform tilshisi «Parasat» baıqaýynyń jeńimpazy boldy
ASTANA. KAZINFORM — Búgin Senatta jýrnalıster arasynda ótken dástúrli «Parasat» baıqaýynyń jeńimpazdaryn saltanatty marapattaý rásimi ótti. Kásibı mereke qarsańynda buqaralyq aqparat quraldarynyń ókilderin Senat tóraǵasy Máýlen Áshimbaev quttyqtady.
Palata Spıkeri buqaralyq aqparat quraldarynyń qoǵamdyq aqparattyq kún tártibin qalyptastyrýdaǵy jáne elimizde júzege asyrylyp jatqan reformalardyń máni men mazmunyn halyqqa túsindirýdegi aıryqsha róline toqtaldy. Sondaı-aq ol qazirgi geosaıası syn-qaterler men jasandy ıntellekt qarqyndy damyp jatqan kezeńde jýrnalısterdiń qyzmeti jaı ǵana aqparat taratýmen shektelmeıtinin atap ótti. BAQ ókilderi búginde memleket pen qoǵam arasyndaǵy ózara senim men ashyq dıalogtyń mańyzdy kópirine aınalyp otyr.
Sonymen qatar Máýlen Áshimbaev Senat Memleket basshysynyń bastamasymen qolǵa alynǵan reformalardy zańnamalyq turǵydan qamtamasyz etý baǵytynda júıeli jumys júrgizip kele jatqanyn aıtty. Bul rette Palata buqaralyq aqparat quraldarymen ashyq ári tyǵyz yqpaldastyqqa basymdyq berip otyrǵany da sóz boldy.
«Qazir Qazaqstan damýdyń jańa kezeńinde asa mańyzdy tarıhı sátti bastan ótkerip jatyr. Prezıdentimiz Qasym-Jomart Kemeluly Toqaevtyń bastamasymen jalpyulttyq referendýmda jańa Konstıtýtsııamyz qabyldandy. Osy úderiste buqaralyq aqparat quraldary aıryqsha ról atqarǵanyn atap ótken jón. Ashyq pikirtalastar, saraptamalar jáne tele-radıo efırleri arqyly zańnamadaǵy árbir norma tyńǵylyqty talqylanyp, azamattardyń qoldaýyna ıe boldy. Sondaı-aq Konstıtýtsııalyq komıssııa quramynda jumys istegen BAQ ókilderi de bar. Memleket basshysy atap ótkendeı, olar Ata Zańnyń teń avtorlarynyń birine aınaldy», – dep, Máýlen Áshimbaev jýrnalısterdi kásibı merekelerimen quttyqtady.
Aıta keteıik, bıyl «Parasat» baıqaýyna qatysý úshin 150-den astam ótinim kelip tústi. Baıqaýǵa telearnalar, radıo, baspasóz basylymdary, aqparattyq agenttikter, ınternet-portaldar, sondaı-aq, óńirlik jáne halyqaralyq buqaralyq aqparat quraldarynyń jýrnalısteri qatysty.
2026 JYLǴY «PARASAT» BAIQAÝYNYŃ JEŃІMPAZDARY
«Úzdik televızııalyq materıal» atalymy:
Irına Álimjanova («Qazaqstan» telearnasy), Erdáýlet Baıdýllaev («Habar» telearnasy), Álibek Rzabaev («Birinshi Eýrazııa» telearnasy).
«Merzimdi baspasózdegi úzdik materıal» atalymy:
«Vremıa» gazetiniń ujymy, Gúlzına Bektasova («Aiqyn» gazeti), Qaragóz Simádil («Ana tili» gazeti).
«Internet-basylymdaǵy úzdik jarııalanym» atalymy:
Rýslan Ǵabbasov (Kazinform halyqaralyq aqparat agenttigi), Rabıǵa Dúısenǵulova («Tengrinews.kz» aqparattyq agenttigi), Zarema Abdrahmetova («BES.media» aqparat agenttigi).
«Áleýmettik jelidegi úzdik jarııalanym» atalymy:
Sabına Sadıeva, Tımýr Asylhanov.
«Jyldyń úzdik saraptamalyq materıaly» arnaıy syılyǵy:
Boıan Brkıch («Euronews»).
«Parlamenttik jýrnalıstıkany damytýǵa qosqan úlesi úshin» arnaıy syılyǵy:
Baný Ádiljan («Egemen Qazaqstan»).
Aıta ketelik keshe Prezıdent buqaralyq aqparat quraldarynyń qyzmetkerlerin merekesimen quttyqtaǵan edi.
