Senattan keıingi qyzmet: eks-depýtattar qazir nemen aınalysyp júr
ASTANA. KAZINFORM — Jańa bir palataly Parlament – Quryltaıdyń quramy 23 tamyzda ótetin saılaýda belgili bolady. Al buǵan deıin Senatta depýtat bolǵan birqatar saıasatker óńirlerde jańa qyzmetke kirisse, endi biri saıası qyzmetin jalǵastyryp, Quryltaı depýtattyǵyna úmitker atandy.
Eks-senatorlardyń qazir qaı salada qyzmet etip júrgenin Kazinform tilshisi sholyp shyqty.
Óńirlerdegi jańa qyzmet
Shildeniń sońy men tamyzdyń basynda burynǵy eki senatordyń óńirlerde jańa qyzmetke taǵaıyndalǵany belgili boldy.
30 shildede Ernur Áıtkenov Pavlodar oblysy Aqtoǵaı aýdanynyń ákimi bolyp taǵaıyndaldy. Tıisti sheshim Prezıdent Ákimshiligimen jáne aýdandyq máslıhat depýtattarymen kelisilip, oblys ákiminiń ókimimen qabyldandy.
Jańa aýdan ákimine ınvestorlarmen jumysty jandandyryp, jańa jobalardy júzege asyrý jáne turaqty jumys oryndaryn ashý mindeti qoıyldy. Sonymen qatar agroónerkásip keshenin damytýǵa basa nazar aýdarý tapsyryldy.
Sondaı-aq, Ernur Áıtkenovke aýdan ortalyǵyndaǵy avtovokzal men qoǵamdyq monshany qalpyna keltirý, basseın salý múmkindigin qarastyrý da júkteldi. Budan bólek, jylytý maýsymyna ýaqtyly daıyndyq júrgizip, sý tasqynynyń aldyn alý sharalaryn iske asyrý qajet. Sonymen birge 2027 jyldyń bıýdjetinde Sholaqsor aýylyna kireberis joldaǵy kópir qurylysyna qarjy qarastyrý josparlanyp otyr.
4 tamyzda burynǵy senator Rýslan Rústemov Qyzylorda oblysy ákiminiń keńesshisi bolyp taǵaıyndaldy.
Rýslan Rústemov eńbek jolyn 1994 jyly Qyzylorda pedagogıkalyq ınstıtýtynda oqytýshy bolyp bastaǵan. 2008-2015 jyldary Shıeli aýdany ákiminiń orynbasary, Qyzylorda qalasy ákiminiń orynbasary qyzmetterin atqaryp, oblystyq tilderdi damytý jáne ishki saıasat basqarmasyn basqarǵan.
2015-2023 jyldary Qyzylorda oblysy ákiminiń orynbasary, Syrdarııa aýdanynyń ákimi, eki ret Jańaqorǵan aýdanynyń ákimi qyzmetin atqardy. Sondaı-aq oblystyq mádenıet jáne sport basqarmasyn basqardy. 2023 jyly Senat depýtaty bolyp saılandy.
Osylaısha, Senattaǵy qyzmetinen keıin eki eks-depýtat ta eńbek jolyn óńirlik memlekettik basqarý salasynda jalǵastyryp otyr.
Quryltaı saılaýyna kimder qatysady
Quryltaı saılaýyna usynylǵan partııalyq tizimderden de burynǵy senatorlardy kezdestirýge bolady.
Máselen, «Ádilet» partııasynyń tizimine Olga Perepechına, Nurlan Beknazarov, Evgenıı Bolgert jáne Marat Qojaev engen.
Olga Perepechına buǵan deıin Senat tóraǵasynyń orynbasary qyzmetin atqarǵan.
Nurlan Beknazarov Senattyń Konstıtýtsııalyq zańnama, sot júıesi jáne quqyq qorǵaý organdary komıtetin basqardy.
Evgenıı Bolgert osy komıtettiń hatshysy boldy.
Marat Qojaev ta atalǵan komıtettiń quramynda jumys istedi. Senatqa kelgenge deıin ol Іshki ister mınıstriniń birinshi orynbasary qyzmetin atqarǵan.
Qazaqstan Halyq partııasynyń tizimine burynǵy senator Lázzat Súleımen de endi. Ol VI jáne VII shaqyrylymdaǵy Senat depýtaty bolǵan.
Eske salaıyq, 1 shildede Qazaqstan Prezıdenti Quryltaı saılaýyn taǵaıyndady.
23 tamyzda qazaqstandyqtar Quryltaıdyń 145 depýtatyn saılaıdy. Olardyń ókilettik merzimi bes jyl bolady.
Buǵan deıin Ortalyq saılaý komıssııasy jeti saıası partııa usynǵan kandıdattardyń partııalyq tizimderin tirkedi. Bir depýtattyq orynǵa tórtke jýyq úmitkerden keledi.
23 shilde saǵat 18:01-de partııalardyń saılaýaldy úgit-nasıhat naýqany bastalyp, jeti saıası partııa da óz saılaýaldy shtabtaryn ashty.
Sondaı-aq Ortalyq saılaý komıssııasy partııalardyń saılaý bıýlletenindegi retin anyqtap, daýys berý kúnine qatysty mańyzdy shekteýlerdi eske saldy.
Eske salaıyq, 12 tamyz saǵat 20:00-de Jibek Joly telearnasynda alǵashqy komandalyq teledebat ótedi.
