Senattaǵy zań jobalaryn talqylaýǵa máslıhat depýtattaryn shaqyrý qajet - T.Muqashev
NUR-SULTAN. QazAqparat - Senattaǵy zań jobalaryn talqylaýǵa máslıhat depýtattaryn shaqyryp otyrý qajet. Bul týraly búgin Senat depýtattarynyń ortalyq atqarýshy jáne jergilikti ókiletti organdardyń basshylarymen kezdesýi barysynda sentor, "Qazaqstan máslıhattary depýtattarynyń birlestigi" RQB tóraǵasy Tóleýbek Muqashev aıtty, dep habarlaıdy QazAqparat tilshisi.
"Parlament Senatynda óńirler kúnin ótkizý qajet. Meniń kózqarasymsha, bul Senat depýtattaryn óńirmen tanystyrady jáne onyń damýy men adamdardyń ómir súrý sapasyn arttyrýǵa baǵyttalǵan mańyzdy áleýmettik-ekonomıkalyq jobalardy odan ary tıimdi iske asyrýyna múmkindik jasaıdy. Máslıhat depýtattaryn zań jobalaryn ázirleý men baqylaý, sonymen qatar olardy iske asyrý kezeńine Parlamenttiń saıtynda eskertpeler men usynystardy, tilekter men pikirlerdi ornalastyrý arqyly tartý kerek. Al óńirler úshin mańyzdylyǵy joǵary zań jobalaryn talqylaý barysynda máslıhat depýtattaryn Parlament Senatyna shaqyrýdy usynamyn", - dedi senator.
Sonymen qatar ol Úkimet ázirleıtin zań jobalarynyń sapasyz bolyp keletindigin, sonyń saldarynan oryndalmaı jatatyndyǵyn aıtty.
"Ózderińiz bilesizder, Senat depýtattary Úkimet ázirlegen zań jobalarynyń sapasyn birneshe ret kóterdi. Áleýmettik-ekonomıkalyq saldardyń naqty baǵalanbaıtyndyǵyna baılanysty biz, depýtattar árqashan zań jobalarynyń qabyldaný nátıjesi men tıimdiligi týraly jan-jaqty kórinisti aıqyndaı almaımyz. Ókinishke oraı iske asyrý kezeńinde kóptegen zańdar oryndalmaıdy nemese júzege asyrylmaıdy", - dedi ol.
Máselen onyń aıtýynsha, 2016 jyly Jer kodeksine aýyl sharýashylyǵy maqsattyndaǵy jer ýchaskelerin ıelenýge qatysty ózgerister engizildi. Keıinirek buǵan Prezıdent Jarlyǵymen moratorıı jarııalandy. Múlik pen kiristi jalpyǵa birdeı deklaratsııalaý týraly zań jobasy da shıki bolýy saldarynan qoldaný merzimi birneshe ret aýystyryldy. Mindetti medıtsınalyq saqtandyrýǵa qatysty túzetýler de halyqtyń kóptegen suraǵyn týyndatty.
"Demek, máslıhat depýtattary Parlament Senatynda qaralatyn zań jobalaryna qatysýy, sondaı-aq qabyldanǵan zańdarǵa sáıkes halyq arasynda aqparattyq túsindirý jumystaryn júrgizip, óńirlermen keri baılanys ornatýǵa, halyqty aldaǵy zańnamaǵa engiziletin ózgeristermen aqparattandyrýǵa múmkindik beredi",- dedi T.Muqashev.
