Senatta zııatkerlik menshik naryǵyn damytýǵa qatysty zań qabyldandy

NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń keıbir zańnamalyq aktilerine zııatkerlik menshik jáne memleket kepildik bergen zań kómegin kórsetý salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» qujat eki oqylymda qaraldy. Talqylaýdan keıin palata depýtattary atalǵan zańdy qabyldady, dep habarlaıdy QazAqparat tilshisi.

«Osy zań jobasymen jumys zııatkerlik menshik salasyndaǵy zańnamany jetildirýdegi kezekti qadam boldy. Bul protsess ulttyq zańnamany halyqaralyq sharttarmen úılestirý aıasynda iske asyryldy. Qazirgi ýaqytta Qazaqstan 19 halyqaralyq shartqa jáne 25 óńirlik kelisimge qatysyp otyr. Osyǵan baılanysty, 2020 jyly Parlament Májilisi Ádilet mınıstrligine osy saladaǵy quqyq qoldaný praktıkasyna taldaý júrgizýdi usyndy. Taldaý Reed Smith kompanııasynyń zań konsýltanttaryn tarta otyryp júrgizildi. Onyń qorytyndysy boıynsha zııatkerlik menshik salasyn odan ári damytý jóninde usynystar ázirlendi», - dedi Parlamen Májilisiniń depýtaty Gúlnar Bıjanova.

Bul jumystyń nátıjeleri Parlament Májilisiniń depýtattaryna tanystyrylyp, egjeı-tegjeıli talqylaýdan keıin zańnamalyq bastamanyń negizine alyndy.

Onyń aıtýynsha, zań jobasynda halyqqa memleket kepildik bergen zań kómegin 2025 jylǵa qaraı 2 esege ulǵaıtý jónindegi mindetti sheshý usynylady. Mundaı mindet «Amanat» partııasynyń saılaýaldy baǵdarlamasynda qoıylǵan.

«Jol kartasyn oryndaý úshin 2022 – 2024 jyldarǵa respýblıkalyq bıýdjetten 8 mlrd 700 mln teńge bólindi. Túzetýler 12 myńnan astam memleket kepildik bergen zań kómegin kórsetýge zań konsýltanttaryn tartýǵa baǵyttalǵan jáne halyqtyń muqtaj toptaryn qamtýǵa kómektesedi. Bul quqyqtyq máselelerdi sheshý tıimdiligin arttyrýǵa, túrli ınstantsııalarǵa júginý sanyn azaıtýǵa yqpal etetin bolady», - dedi G. Bıjanova.

Óz kezeginde Senat Tóraǵasy Máýlen Áshimbaev qabyldanǵan zań zııatkerlik menshik quqyǵyn odan ári jetildirýdi kózdeıtinin atap ótti.

«Zań osy quqyqtardy ujymdyq negizde basqaratyn uıymdardyń jáne patenttik senim bildirilgen ókilderdiń qyzmetiniń ashyqtyǵyn qamtamasyz etýge arnalǵan. Sondaı-aq qujatta zııatkerlik menshik quqyqtary men ónerkásiptik menshik obektilerin qorǵaýdy kúsheıtý máselesi qarastyrylǵan. Zańda ulttyq zańnama normalaryn osy saladaǵy halyqaralyq ustanym men tájirıbeleriniń erejelerimen sáıkestendirýge qatysty da normalar bar. Sonymen qatar, engizilgen ózgerister memleket kepildik bergen zań kómegin alý aıasyn keńeıtýge de baǵyttalyp otyr. Aldaǵy ýaqytta osy zań elimizde zııatkerlik menshik naryǵyn damytýǵa, azamattardyń quqyqtaryn qamtamasyz etýge óz septigin tıgizedi dep senemiz», - dedi Senat Tóraǵasy.