Senatta jol qaýipsizdigi máselesi talqylandy

ASTANA. KAZINFORM – Senatta jol qaýipsizdigi jónindegi sharalar, qaterler men keleshegi talqylandy. Bul týraly Senattyń baspasóz qyzmeti málim etti. 

Сенатта жол қауіпсіздігі мәселесі талқыланды
Фото: ҚР Парламенті Сенатының баспасөз қызметі

Senattyń Konstıtýtsııalyq zańnama, sot júıesi jáne quqyq qorǵaý organdary jónindegi komıtetiniń depýtattary Memleket basshysynyń «Ádiletti Qazaqstan: zań jáne tártip, ekonomıkalyq ósý, qoǵamdyq optımızm» atty Qazaqstan halqyna Joldaýy aıasynda jol qozǵalysy qaýipsizdigin qamtamasyz etý jáne jol-kólik oqıǵalarynyń aldyn alý máseleleri boıynsha dóńgelek ústel otyrysyn ótkizdi.

Senat komıtetiniń tóraǵasy Nurlan Beknazarov óziniń kirispe sózinde qazirgi jaǵdaı jol qozǵalysy qaýipsizdigin qamtamasyz etýde zamanaýı ádister ázirleýdi talap etetinin atap ótti.

– Bul másele zańnamany jetildirýdi, memlekettik baqylaýdyń tıimdiligin arttyrýdy jáne júrgizýshilerdi daıyndaý sapasyn jaqsartýdy qamtıtyn keshendi tásildi qajet etedi, – dedi ol.

Senator Marat Qojaev shara barysynda jol-kólik oqıǵalarynyń aldyn alý sharalaryn kúsheıtýdiń mańyzdylyǵyna toqtaldy. Qatysýshylar jol qozǵalysy erejesin saqtaýǵa baqylaýdy kúsheıtý, zamanaýı beınebaqylaý tehnologııasyn engizý jáne apat jıi bolatyn jerlerdi taldaý qajettigin atap ótti. Sondaı-aq, júrgizýshiler men jaıaý júrginshilerdiń jaýapkershiligin arttyrý, jolda júrý mádenıetin kóterý maqsatynda bilim berý baǵdarlamalaryn engizý men áleýmettik jarnamany paıdalaný máseleleri kóterildi.

Kólik mınıstriniń orynbasary Sátjan Ablalıev qys mezgilindegi jol ınfraqurylymynyń jaı-kúıi týraly baıandady. Ol respýblıkalyq kúre joldardy kútip ustaýǵa arnalǵan jolda paıdalanatyn tehnıkanyń tapshylyǵy bar ekenin habarlady. Ol úshin 2024 jyly 140 dana tehnıka satyp alynǵan bolatyn, al 2025 jyldyń basynda taǵy 381 tehnıka satyp alý josparlanyp otyr. Bul baǵyttaǵy jumys turaqty baqylaýda.

Dóńgelek ústel qorytyndysy boıynsha zańnamany jetildirý, jol ınfraqurylymyn jaqsartý jáne aldyn alý sharalaryn kúsheıtý jóninde tıisti usynystar ázirlenetin boldy. Barlyq usynystar zerdeleý jáne iske asyrý úshin tıisti memlekettik organdarǵa joldanatyn bolady.

Eske sala keteıik, buǵan deıin senatorlar áskerı qyzmet týraly zańdy qaraıtynyn jazǵan bolatynbyz.

Сейчас читают