Senatta jerasty sý resýrstaryn tıimdi paıdalaný máselesi kóterildi

ASTANA. KAZINFORM — Senator Janbolat Jórgenbaev óziniń depýtattyq saýalynda sý qaýipsizdigi salasyndaǵy strategııalyq qaýipter týraly aıta kelip, klımattyń ózgerýi, sý qorynyń azaıýy jáne transshekaralyq ózenderge táýeldilik jaǵdaıynda jerasty sý resýrstaryn jetkiliksiz paıdalaný máselesine nazar aýdardy.

— Qazaqstan aýmaǵynda ónerkásiptik jerasty sýlary anyqtalǵanymen, olardyń áleýeti ekonomıkalyq aınalymǵa tolyq engizilmegen. Qazaqstan Respýblıkasynda jerasty sýlarynyń bekitilgen eksplýatatsııalyq qorlary táýligine shamamen 43,1–43,2 mln tekshe metrdi quraıdy, alaıda is júzinde osy kólemniń nebári 3-4 paıyzy ǵana paıdalanylyp jatyr. Bul jerasty sý resýrstarynyń eleýli bóliginiń ekonomıkalyq aınalymnan tys qalyp otyrǵanyn jáne olardy basqarý júıesiniń jetkiliksizdigin kórsetedi», — dedi J. Jórgenbaev Úkimet basshysynyń atyna joldaǵan saýalynda.

Depýtat osyǵan baılanysty jerasty sýlaryn barlaý jáne paıdalaný salasyndaǵy mekemearalyq úılestirýdi kúsheıtýdi, avtomattandyrylǵan tehnologııany paıdalana otyryp ulttyq monıtorıng júıesin qurýdy usyndy. Munymen qosa, gıdrogeologııalyq derekter men onlaın-baqylaýdy kiriktirip, «Water Base» tsıfrlyq platformasynyń tolyqqandy iske qosylýyn qamtamasyz etý týraly oılaryn ortaǵa saldy.

Odan basqa, gıdrogeologııa salasynda kadrlardy daıarlaý jáne tartý boıynsha júıeli sharalar qabyldaý, uńǵymalardy burǵylaý men paıdalanýdy baqylaýdy kúsheıtý, sondaı-aq ǵylymı negizdelgen ulttyq tujyrymdamany jáne jerasty sý resýrstaryn basqarý jónindegi jekelegen memlekettik baǵdarlamany ázirleý múmkindigin qarastyrý usynyldy.

Budan buryn habarlanǵandaı, bıyl elimizdiń sý-energetıka resýrstarynyń kartasy ázirlenedi.