Senatta V shaqyrylym jumysy qorytyndylandy
ASTANA. QazAqparat - Senat Tóraǵasy Qasym-Jomart Toqaev Bıýro múshelerimen keńes ótkizdi, onda Parlamenttiń V shaqyrylymy kezeńindegi Senat qyzmetiniń nátıjeleri qorytyndylandy, sondaı-aq Palata jumysynyń jospary qaraldy.
Keńeste besinshi shaqyrylymda Senat 127 otyrys ótkizgeni, onda 508 zań jobalary men Senattyń erekshe jáne derbes qaraýyna jatatyn 50-den astam máseleler qaralǵany atalyp ótildi. Shaqyrylym kezinde Parlament 7 kodeks, 59 derbes zań, keıbir zańnamalyq aktilerge ózgerister men tolyqtyrýlar engizý týraly 205 zań, halyqaralyq sharttar men kelisimderdi ratıfıkatsııalaý týraly 237 zań qabyldady. Olardyń ishinde 30 zań Parlament depýtattarynyń bastamasymen ázirlendi. «Bes ınstıtýttyq reformalardy iske asyrý jónindegi 100 naqty qadam» Ult jospary aıasynda Parlament 2015 jylǵy kúzde 59 zań qabyldady. Shaqyrylym kezinde 484 depýtattyq saýaldar jarııa etilip, joǵarǵy Palatanyń turaqty komıtetteri 120-dan astam shara ótkizdi.
2016 jylǵy 21 qańtar men 24 naýryz aralyǵyndaǵy Parlamenttiń qyzmetin atqarǵan kezeńde Senat 57 zańdy qarap, qabyldady. Bul ýaqytta zań jobalaryn qaraǵan kezde senatorlar 1490 túzetý engizdi. Q.Toqaev qujattarmen jumys barysyndaǵy jemisti jumysy úshin komıtet tóraǵalary men barlyq depýtattarǵa alǵys aıtty.
Zań shyǵarý qyzmetiniń jospary jaıynda aıta kelip, Senat Tóraǵasy 25 naýryzda Parlamenttiń VI shaqyrylymyndaǵy birinshi sessııany asharda Prezıdent N.Nazarbaev alǵa qoıǵan mindetterdi eske saldy. Biryńǵaı salyq jáne keden kodeksterin, «Jer qoınaýy jáne jer qoınaýyn paıdalanýshylar týraly» kodeksti qabyldaý, elektr energetıkasy, básekelestik máseleleri týraly zańnamaǵa ózgerister engizý, sondaı-aq básekelestik ortaǵa memlekettik mindetteri odan ári berý bóligindegi zańnamany jetildirý qajettigi týraly aıtyldy.
«Memleket basshysy jańa jaǵdaıda tutastaı Parlamenttiń jáne onyń palatalarynyń jalpy saıası róli men jaýapkershiligi arta túsetinin erekshe atap ótti jáne zań shyǵarý úderisterinde ózara syndarly is-qımyly dástúri jalǵasa beretinine senim bildirdi», - dep atap ótti Q.Toqaev. Qazaqstandyq depýtattardyń halyqaralyq parlamentaralyq qoǵamdastyqqa belsendi qatysýy da mańyzdy mindetterdiń biri bolyp tabylady.
Keńeste Senattyń sáýirge josparlanǵan sharalary da talqylandy. Bıýronyń tapsyrmasy boıynsha Senat «EAEO jáne DSU jaǵdaıynda otandyq agrarlyq sektordyń básekege qabilettiligin arttyrý - zańnamalyq retteý jáne onyń is júzinde júzege asyrý» taqyryby boıynsha Parlamenttik tyńdaýǵa ázirlik jumystaryn júrgizedi. Senattaǵy tyńdaý 29 sáýirge josparlandy.
Keńesti qorytyndylaı kelip, Senat Tóraǵasy jańa parlamenttik maýsymda depýtattardyń úılesimdi ári ónimdi jumystary jalǵasatynyna senim bildirdi.
