Senatta ýran salasy qyzmetkerleriniń quqyqtaryn qorǵaý máselesi kóterildi

NUR-SULTAN. QazAqparat – Senator Murat Baqtııaruly elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda jer qoınaýy jáne ony paıdalaný týraly zańnamaǵa ózgerister engizý qajettigi týraly másele kóterdi, dep habarlaıdy QazAqparat tilshisi.

Depýtat osy saýalǵa Qyzylorda oblysynyń Shıeli aýdanynda jumys isteıtin ýran ónerkásibiniń 2000-ǵa jýyq qyzmetkeriniń ótinishi negiz bolǵanyn atap ótti.

Onyń aıtýynsha, 2018 jyly kúshine engen Kodeks normalaryn qoldaný barysynda osy Kodeks qoldanysqa engizilgenge deıin jasalǵan sharttardyń qoldanylý merzimin uzartý sııaqty máseledegi olqylyq baıqalǵan. Mundaı jaǵdaı ýran kenishterinde óndiristiń toqtap qalý qaýpin týǵyzady. Al bul óz kezeginde jumyssyzdyqqa, óńirlerdegi áleýmettik shıelenistiń ósýine, salyq jáne bıýdjetke tólenetin basqa da aýdarymdar men tólemderdiń, sondaı-aq jyl saıyn óńirdiń áleýmettik damýyna aýdarylatyn qarajattyń toqtatylýyna ákep soqtyrýy múmkin.

«Óńirlerde belgili bir áleýmettik-ekonomıkalyq turaqtylyqty qamtamasyz etetin joǵaryda atalǵan ýran kenishteriniń qyzmet etý merzimin uzartý maqsatynda, bıylǵy jyldyń qarasha aıynyń sońyna deıin «Jer qoınaýy jáne jer qoınaýyn paıdalaný týraly» Qazaqstan Respýblıkasynyń Kodeksine, atap aıtqanda, ótpeli erejeler taraýyna osy Kodeks kúshine engenge deıin jasalǵan ýrandy óndirýge arnalǵan kelisimsharttardyń qoldanylý merzimin uzartý múmkindigin beretin ózgerister men tolyqtyrýlar engizý qajet. Osyǵan oraı, qurmetti Álıhan Ashanuly, Qazaqstan Respýblıkasynyń zańnamalarymen retteý týraly máseleni qarastyrýyńyzdy jáne qarapaıym jumyskerlerdiń jumys ornyn saqtap qalýǵa barynsha yqpal jasaýyńyzdy suraımyz», - dedi senator.