Senatta ulttyq sport túrlerin damytý máselesi talqylandy

ASTANA. KAZINFORM – Senattyń Áleýmettik-mádenı damý jáne ǵylym komıtetiniń depýtattary týrızm jáne sport mınıstrliginiń basshylyǵymen kezdesti. Kezdesýge qatysýshylar ulttyq sport túrlerin damytý men saladaǵy ózekti máselelerdi qarady jáne olardy zańnamalyq deńgeıde jedel sheshý joldaryn talqylady.

Komıtet tóraǵasy Nurtóre Júsip sońǵy jyldary elimizde ulttyq sporttyń tanymaldylyǵynyń turaqty ósý úrdisi baıqalyp otyrǵanyn, sonymen birge memlekettiń ulttyq sport túrlerin qoldaýdaǵy róli de aıtarlyqtaı artyp kele jatqanyn atap ótti.

«Elimizde ulttyq sportty damytý – asa mańyzdy ári ózekti másele. Berilgen resmı mártebesi men áleýmettik mańyzy joǵary bolsa da, ulttyq sport áli kúnge deıin qoǵam men jas urpaqtyń ómir saltynyń ajyramas bóligi bola almaı keledi. Sonymen qatar, bul salada óz sheshimin talap etetin eleýli problemalar da bar», - dep atap ótti Nurtóre Júsip.

Mádenıet jáne sport mınıstrliginiń ókili kezdesý kezinde elimizde 11 ulttyq sport túri resmı tirkelgenin, al olarmen júıeli túrde aınalysatyn sportshylardyń sany sektsııalarda dene shynyqtyrýmen jáne sportpen aınalysatyndardyń jalpy sanynyń 8,7%-yn quraıtynyn atap ótti. Sonymen qatar, elimizde jyl saıyn sport túrleriniń ulttyq tizilimine engizilgen halyqaralyq deńgeıden aýyldyq deńgeıge deıingi myńnan astam jarys ótkiziledi. Bıyl halyqaralyq jarystardan ulttyq qurama músheleri 10 altyn, 13 kúmis, 20 qola medal jeńip aldy.

Sharaǵa sonymen qatar ulttyq sport túrleri qaýymdastyǵynyń, qalalyq jáne oblystyq máslıhattardyń ókilderi, sondaı-aq sala sarapshylary qatysty.