Senatta Ýkraınanyń Joǵarǵy Radasynyń baıqaýshylarymen kezdesý boldy

NUR-SULTAN. QazAqparat – Búgin, 8 qańtarda Senat Tóraǵasynyń orynbasary Asqar Shákirov Qazaqstan Respýblıkasy Parlamenti Májilisi men máslıhattarǵa saılaýdy baıqaýǵa kelgen Ýkraına Joǵarǵy Radasy depýtattarynyń delegatsııasymen kezdesti. Bul týraly QazAqparat joǵary palatanyń baspasóz qyzmetine silteme jasap habarlaıdy.

Senat Tóraǵasynyń orynbasary aldaǵy saılaýǵa daıyndyq týraly habardar etip, saılaýǵa halyqaralyq baıqaýshylardyń qatysýynyń mańyzyn atap ótti.

«Qazaqstan saılaý protsesteriniń jalpyǵa birdeı standarttarǵa qatań túrde sáıkes uıymdastyrylýyna erekshe mán beredi», - dedi Asqar Shákirov.

Bizdiń elimiz halyqaralyq bedeldi uıymdardyń usynystaryn eskere otyryp, daýys berý sharalarynyń tıisti deńgeıde uıymdastyrylýyn qamtamasyz etý úshin barlyq sharalardy qabyldap jatqany atap ótildi.

Qazaqstanda ótken jyly eldegi saıası júıeni jetildirý boıynsha naqty is-sharalar qabyldanǵan bolatyn. 2020 jyly Prezıdenttiń saıası reformalar toptamasyn zańnamalyq turǵyda iske asyrý qamtamasyz etildi, onyń ishinde partııa tizimi boıynsha áıelder men jastarǵa arnalǵan 30% kvota bolady, saıası partııalardy tirkeýdiń tártibi ońaılatyldy jáne parlamenttik oppozıtsııa ınstıtýty engizildi.

Ýkraın parlamenti ókilderi saılaýǵa daıyndyqty uıymdastyrýdyń joǵary deńgeıin atap ótti jáne halyqaralyq uıymdarǵa baqylaý úderisine kómektesetin qoldaýdy oń baǵalady.

Kezdesýge Qazaqstan Respýblıkasy Parlamenti Senatyndaǵy Joǵarǵy Radamen yntymaqtastyq jónindegi toptyń múshesi, depýtat Altynbek Nýhuly qatysty.