Senatta týrızm jáne sportty damytýdyń keleshegi qaraldy
ASTANA. KAZINFORM – Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip týrızm jáne sport mınıstri Ermek Marjyqpaevpen kezdesti.
Kezdesýge qatysýshylar týrıstik salany damytý, sport jáne dene shynyqtyrý salasyndaǵy memlekettik jastar saıasatyn iske asyrý, sportshylardy aldaǵy Olımpıada oıyndaryna daıyndaý, sondaı-aq oıyn bıznesiniń jarnamasy men nasıhattaýǵa jaýapkershilikti kúsheıtý máselelerin talqylady.
Parlamentshi týrızmdi damytýǵa Senat depýtattary erekshe nazar aýdaryp otyrǵanyn atap ótti. Elimizdiń tarıhı baı murasy, ulttyq ereksheligi men kórikti tabıǵaty sheteldik týrısterdiń kóptep kelýine tartýǵa serpin bere alady.
«Prezıdent Qasym-Jomart Toqaev týrızmdi damytý máselesine udaıy nazar aýdaryp otyrady jáne serpindi jobalardy iske asyrý qajettigin atap ótken bolatyn. Alaıda, bul salada áli de eleýli nátıjege jete alǵan joqpyz, sondyqtan kem degende 15 iri jobanyń tizimin pysyqtaý mańyzdy ekeni daýsyz. Ol úshin sheteldik ınvestorlar men otandyq bıznesti de tartý qajet. Senatorlar ekonomıkany nyǵaıtý men elimizdiń damýyna osy mindetterdiń mańyzy zor dep sanaıdy jáne Úkimetti osy baǵytta keshendi túrde jumys júrgizýge shaqyrady. Qajet bolǵan jaǵdaıda Memleket basshysynyń tapsyrmalaryn sapaly jáne ýaqtyly oryndaýǵa baǵyttalǵan aýqymdy sharalardy kózdeıtin tıisti qujattardy ázirleý kerek. Parlament osy mindetterdi iske asyrýda jan-jaqty kómek kórsetýge daıyn», - dedi Nurtóre Júsip.
Ermek Marjyqpaev óz kezeginde mınıstrliktiń aǵymdaǵy qyzmeti, sportshylardy halyqaralyq jarystarǵa daıyndaý men týrızm, sport jáne oıyn bıznesi salasyndaǵy zańnamany jetildirý jumystary týraly aıtty.
