Senatta turǵyn úı jaǵdaılaryn jaqsartýǵa qatysty zań qaralady

ASTANA. KAZINFORM — Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Bul týraly Senattyń baspasóz qyzmeti habarlady.

Onda depýtattar 17 qazanda bolatyn Senat otyrysynyń kún tártibin bekitti jáne Palatanyń is-sharalar josparyn iske asyrý aıasyndaǵy mindetterdi talqylady.

Otyrysty ashqan Máýlen Áshimbaev aldymen ótken aptada uıymdastyrylǵan Álemdik jáne dástúrli dinder kóshbasshylary Sezi Hatshylyǵynyń XXII otyrysy men І Jas dinı lıderler forýmyn qorytyndylady. Senat Tóraǵasy atalǵan is-sharalar barysynda aıtylǵan usynystar men ıdeıalardyń mańyzyna nazar aýdaryp, onyń bári 2025 jylǵy 17-18 qyrkúıekte Astanada ótetin «Dinder dıalogy: bolashaq jolyndaǵy sınergııa» taqyrybyna arnalǵan Álemdik jáne dástúrli dinder kóshbasshylarynyń VIII Seziniń paneldik sessııalarynda eskeriletinin tilge tıek etti.

Sonymen qatar senatorlar Palatanyń is-sharalar josparyna sáıkes osy aptada ótkiziletin kóshpeli otyrystardyń kún tártibin talqylady. Naqty aıtqanda, Memleket basshysynyń «Ádiletti Qazaqstan: Zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn iske asyrý sheńberinde memlekettik qyzmetti jetildirý, qylmystyq jolmen alynǵan kiristerdi jylystatýdy zańdastyrýǵa jáne terrorızmdi qarjylandyrýǵa qarsy is-qımyldy kúsheıtý, sondaı-aq, sharýalardy janar-jaǵarmaımen jáne mıneraldy tyńaıtqyshtarmen qamtamasyz etý máseleleri boıynsha depýtattardyń aldaǵy jumysy sóz boldy.

Bekitilgen kún tártibine sáıkes senatorlar aldaǵy beısenbide «Qazaqstan Respýblıkasynyń keıbir zańnamalyq aktilerine turǵyn úı saıasatyn reformalaý máseleleri boıynsha ózgerister men tolyqtyrýlar engizý týraly» zańdy qaraıdy. Qujat turǵyn úı qatynastary salasyndaǵy zańnamany odan ári jetildirýdi kózdeıdi.

Zań kommýnaldyq turǵyn úı qorynan muqtaj adamdarǵa turǵyn úı berý nemese jeke turǵyn úı qorynan jergilikti atqarýshy organ jaldaǵan turǵyn úı berý, turǵyn úıge jaldaý aqysynyń bir bóligin sýbsıdııalaý jáne turǵyn úı jaǵdaılaryn jaqsartýǵa arnalǵan taǵy basqa memlekettik qoldaý sharalaryn belgileıdi, — delingen Senattyń baspasóz habarlamasynda.

Sondaı-aq Bıýro otyrysynda Májilisten kelip túsken zańdar jumys úshin turaqty Komıtetterge bólinip berildi.

Eske salsaq, Senattyń ótken jalpy otyrysynda Marat Qojaev depýtat retinde ant bergenin habarlaǵanbyz.